ସଂସାର ଗହନ ବନ
ସଂସାର ଗହନ ବନ
ସଂସାର ଗହନ ବନରେ ମନୁଆ
ସଂସାର ଗହନ ବନ
ଏ ବନ ବିଷମ ହିଂସ୍ର ଜୀବପୂର୍ଣ୍ଣ
ନିଘଞ୍ଚ ତମସାଚ୍ଛନ୍ନ ||
ଏଠି ବାଘ ଭାଲୁ ହୋନ୍ତି ସାଲୁବାଲୁ
ଗଜ ଗଣ୍ଡାର ଗର୍ଜନ
ଗଧିଆ ବଳିଆ ବାନର ବିଲୁଆ
ବିଷଧର ସର୍ପଗଣ ||
ଅଛି କଣ୍ଟା ଝଣ୍ଟା ବଣ ବୁଦା ଲଟା
ଅନେକ ଅଗମ୍ୟ ସ୍ଥାନ
ଝିଲ୍ଲୀ ଝିଙ୍କାରିତ ଦୁରୁଗମ ପଥ
କଙ୍କରିତ ନୀରିଜନ ||
ଏ ବନେ ପଶିଲେ ବାଘୁଣୀ ଖାଇବ
ଭାଲୁ ରାମ୍ପୁଡ଼ିବ ତନ
ସିଂହର ଗର୍ଜ୍ଜନ ମହିଷ ତର୍ଜନ
କାଳ ଭୁଜଙ୍ଗ ଦଂଶନ ||
ଏଠି ଦ୍ୱିଗୋଡ଼ିଆ ପଶୁଏ ଅଡ଼ୁଆ
ବହୁରୂପୀ ଭୟଙ୍କର
ପର ଶ୍ରୀକାତର ପର ହିଂସାତୁର
ପର ପୀଡ଼ନେ ତତ୍ପର ||
ହାତେ ମାପି ଏଥି ଚାଖଣ୍ଡେ ଚାଲିଲେ
ତଥାପି ଆସେ ବିପଦ
ଉପର ମହୁର ଭିତର ଜହର
ନିରତ କପଟ ଛନ୍ଦ ||
ବନରୁ ବାହାରି ମନ ଗହନରେ
କର ଯାଇ ବିଚରଣ
ମନକୁ ଚିହ୍ନିଲେ ମନକୁ ଜିଣିଲେ
ପାଇବୁ ଠିକଣା ସ୍ଥାନ ||
ମନ କର ଗୁରୁ ମନ କର ସରୁ
ମନ କର ନିୟନ୍ତ୍ରଣ
ମନ ମୂଳେ ବନ୍ଧା ଚଉଦ ଭୁବନ
ମନ ମୂଳେ ଭଗବାନ ||