ସନେଟ୍ : ତୁମେ

ତୁମେ ମୋର ସଜ ଫୁଟା ଫୁଲଟ ପ୍ରୀତିର 

ତୁମେ ମୋର ଅଭିଧାନ ନିରବ ଭାଷାର 

ମୋ ମନ ବୀଣାରେ ତୁମେ ଅଟ ସାତସୁର 

ତୁମେ ହିଁ ମୋ ଜୀବନର ଅମୃତ ନିର୍ଝର ।।

ମୋ ଆଖି ପଲକେ ତୁମେ ସୁବର୍ଣ୍ଣର ଚୁଡ଼ା 

ଅଧରରେ ରଙ୍ଗ ତୁମ ଗୋଲାପ ପାଖୁଡା 

ଫଗୁଣରେ ତୁମେ ମୋର ଫଗୁ ବାରିଧରା 

ଅମା ଅନ୍ଧକାରେ ତୁମେ ଚାନ୍ଦର ଫୁଆରା ।।

ମୋ ଜୀବନ ମରୁଭୂମେ ତୁମେ ଜଳବିନ୍ଦୁ 

ତୁମ ପାଇଁ ଲଙ୍ଘି ପାରେ ମୁଁ ଯେ ସାତ ସିନ୍ଧୁ 

ହାତରେ କଙ୍କଣ ତୁମ  ପାଦରେ ନୂପୁର 

ତୁମ ପାଇଁ ଗାଇବି ମୁଁ  ମଧୁର  ଝଙ୍କାର ।।

ମୋ ହୃଦ ଆକାଶେ ତୁମେ ଧ୍ରୁବତାରା ସମ 

ପଥ ପ୍ରଦର୍ଶକ ମୋ ଶାଶ୍ଵତ ଆମ ପ୍ରେମ ।।