ସନ୍ଧ୍ୟା ଭ୍ରମଣ
ସନ୍ଧ୍ୟା ଭ୍ରମଣ
ପଦବ୍ରଜେ ଗଲେ ସାନ୍ଧ୍ୟ ଭ୍ରମଣରେ
ମିଳଇ ଅପାର ଶାନ୍ତି
ଖାଲି ହୋଇଯାଏ ମନରୁ ଦୁଶ୍ଚିନ୍ତା
ଅସ୍ତରାଗ ଶୋଭା ଦେଖି ।
ପଶ୍ଚିମ ଆକାଶେ ଦିଗନ୍ତ ବିସ୍ତାରୀ
ଲୋହିତ ବର୍ଣ୍ଣର ବିଭା
ବୁଡି ଆସୁଥିବେ ଅସ୍ତଗାମୀ ରବି
ଦପଦପ ସନ୍ଧ୍ୟା ତାରା ।
ଥିଲେ ଶୁକ୍ଳପକ୍ଷ ପୂରୁବ ଦିଗରେ
ଘଡ଼ି ମାରୁଥିବ ଜହ୍ନ
ନଦୀକୂଳ ଅବା ଖୋଲା ପଡିଆରେ
ବହେ ଶୀତଳ ପବନ ।
ସଙ୍ଗେ ଥିଲେ ସାଥି ଚାଲେ କଥାବାର୍ତ୍ତା
ଜମେ ଅସରନ୍ତି ଗପ
ଜାଣି ହୁଏନାହିଁ ବିତଇ ସମୟ
ରାତିରେ ହୁଅଇ ନିଦ ।
ଆଖିରେ ପଡ଼ଇ ପ୍ରାକୃତିକ ଦୃଶ୍ୟ
ସୁନ୍ଦର ସୁମନୋହର
ଫେରନ୍ତି ନୀଡ଼କୁ ଜାତିଜାତି ପକ୍ଷୀ
ଗୋଶାଳାକୁ ଗୋରୁପଲ ।
ବାଟୋଇଙ୍କ ସାଥେ ହୁଏ ସମ୍ଭାଷଣ
ସୁଯୋଗ ସନ୍ଧ୍ୟା ଭ୍ରମଣ
ଅଭ୍ୟାସ ନିଶ୍ଚୟ କରିବା ଉଚିତ
ପ୍ରଫୁଲ୍ଲ ରହିବ ମନ ।