ସମୟ

ଅପେକ୍ଷା କରିଲେ ଦୁଃଖ ଆଉ କଷ୍ଟେ ସମୟଟା ଲାଗେ ବେଶି,

ସୁଖ-ମଜାବେଳେ ଆମରି ହାତରୁ ସମୟଟା ଯାଏ ଖସି ।

ସମୟକୁ ଯିଏ କାମରେ ଲଗାଏ ତା'ପାଇଁ ବଳକା ହୁଏ,

ସମୟକୁ ଯିଏ ବେଖାତିରି କରେ ତା'ଠାରୁ ଦୂରେଇ ଯାଏ ।

ସମୟକୁ ଦେଖି ଆଗୁଆ ଆସିଲେ ସହଜ ହୁଅଇ କାମ,

ଅଳପ ସମୟ ବିଳମ୍ବ ହୋଇଲେ ମିଳିପାରେ ଅପମାନ ।

ସମୟ ପାଉନି କହନ୍ତି ମିଛୁଆ ନହେଲେ ଥିବ ସେ ବୋକା,

ଗୁରୁତ୍ୱକୁ ଦେଖି ସମୟ ବାଣ୍ଟିଲେ ପାଇବାନି କେବେ ଧୋକା ।

ଅଜାଣତେ ଆମେ କେତେ ମୂଲ୍ୟବାନ ସମୟକୁ କରୁ ନଷ୍ଟ,

ହିସାବ କରି ଯେ ସଂଚୟ କରିବ ପାଇବନି କେବେ କଷ୍ଟ । 

ସମୟକୁ ଯିଏ ଈଶ୍ୱର ଭାବିବ ହେବ ସେ ଵିଵେକୀ ଜଣେ,

ଅଳପ ସମୟ ଆମର ଜୀବନ ଏ'କଥା ରଖିବା ମନେ । 

#ସିଧାକଥା-୪୭