ସ୍ମୃତିର ନିଆଁ

ପହିଲି ପ୍ରେମର ପହିଲି ସ୍ମାରକୀ

ଛବିଟି ଦେଖିଲା ପରେ

ମନ ଜଳିଯାଏ ସ୍ମୃତିର ନିଆଁରେ

ଆଖିତଳେ ଲୁହ ଭରେ I

ଏବେବି ସେ ନଈ ଅଛି ସେଇଠାରେ

ଯେଉଁ ନଈକୂଳେ ଦିନେ

ମୋ ମନର କଥା ଶୁଣି ତୁମେ ସଖୀ

ହସିଥିଲ ମନେ ମନେ I

ସେ ଅଳସୀ ନଈ ଅଳସ ତୁଠରେ

ସ୍ମୃତିର ପଥର ଘାଟ

ମନେ ପଡିଯାଏ ତୁମ ସହ ମୋର

ପହିଲି ପହିଲି ଭେଟ I

ହୃଦୟ କୁ ଯେବେ ହୃଦୟ ଚିହ୍ନିଲା

ମନ ଚିହ୍ନିଥିଲା ମନ

ଜୀବନ ବେଦୀରେ କରିଥିଲେ ଆମେ

ପ୍ରଣୟର ଆବାହନ I

ଆଖି ଆଗେ ଆଜି ଜୀବନ୍ତ ଦିଶୁଛି

ଅତୀତର ପ୍ରତିକ୍ଷଣ

ତୁମରି ଦେହର ନୀଳ ଲଫୀପାରେ

ରଖିଥିଲି ମୋର ମନ I

ତୁଠ ପଥରଟି ସେଇଠି ପଡିଛି

ନଈବି ଗଲାଣି ଶୁଖି

ତୁମେ ଚାଲିଗଲ ବହୁଦୂର ସଖୀ

ଓଦା କରି ମୋର ଆଖି I