ସ୍ମୃତି

ସମୟ ନଈ ତୁଠରେ ତୋର

ଅଭୁଲା ଏକ ଗାଆଁ

ସେଇଠି ଅଛି ଘର ମୋହର

ସ୍ମୃତି ତାହାରି ନାଆଁ !! ୧

ଖଟା ମିଠା ତା' ଦରବ କେତେ

ହସାଏ ମୋତେ ନିତି

କନ୍ଦାଇ ଦିଏ ମନେ ପଡ଼ିଲେ

ଅଭୁଲା ତାହାର ପ୍ରୀତି !! ୨

ସେଇଠି ଅଛି ଖୁସି ଯେ କେତେ

ଦେଇଛି ମୁହିଁ ଛାଡ଼ି

ଭାଙ୍ଗି ଯାଇଛି କେତେ ଖେଳନା

ଡାକେ କେ ହାତ ଠାରି !! ୩

ସପନେ ଆସି କିଏ ସେ ଡାକେ

ଖେଳିବି ତା'ର ସଙ୍ଗେ

ହଜି ଯିବାକୁ ଧୂଳି ବାଲିରେ

ସଜାଇ ସାତ ରଙ୍ଗେ !! ୪

ଗାଁ ଦାଣ୍ଡର ଶୀତ ସକାଳ

ଖରା ଦିନର ସଞ୍ଜେ

ବରଷା ଦିନେ ପାଣିର ସୁଅ

ମନକୁ ମୋର ରଞ୍ଜେ !! ୫

ଶୁଭଇ ଘଣ୍ଟ ଘଣ୍ଟା ଆଳତୀ

ଭଜନ ମିଠା ବାଣୀ

ରଘୁଆ ଅଜା ଭାଗବତ ରୁ

କହୁଥାନ୍ତି କାହାଣୀ !! ୬

ମାର୍କଣ୍ଡ ଋଷି ସାତ ବରଷେ

ବେଙ୍ଗକୁ ଥିଲେ ବାନ୍ଧି

ବାନ୍ଧନ୍ତେ ଯମ ଦୂତ ତାହାଙ୍କୁ

ରଡୁ ଥିଲେ ସେ କାନ୍ଦି !! ୭

ରାମାୟଣ ଯେ ମହାଭାରତ

ସୁନ୍ଦରା ବନ କାଣ୍ଡ

କୃଷ୍ଣଙ୍କ ବାଣୀ ଗୀତାରୁ ଶୁଣି

ସାଷ୍ଟାଙ୍ଗ ପ୍ରଣିପାତ !!

ବାଳ ସୁଲଭ ହୃଦୟ ମୋର

ଯାଇଛି କାହିଁ ହଜି

ପାଉନି ସେହି ଭାବନା ମୋର

ଦେ ତୁ ମୋତେ ଖୋଜି !! ୮

ଚଢ଼େଇ ମେଳେ ଶୁଣେ ମୁଁ ଗୀତ

କାଉ କରଇ କା କା

ବୋଉ ଡାକଇ ସକାଳ ହେଲା

ଇସ୍କୁଲ ଉଠି ଯାଆ !! ୯

ଚାଟଶାଳୀର ପ୍ରଥମ ଦିନ

ଲୁଚି ମୁଁ ଥିଲି ଯାଇ

କବାଟ କୋଣ ଏବେ ବି ଅଛି

ସେଇଠି ମୋର କାହିଁ !! ୧୦

କ୍ରମଶଃ....

ଭାରତୀ