ସ୍ମୃତି

ତୁମ ପଛେ ପଡି ସାରି ଦେଲି ବଳ ବେଳ,

ଶେଷେ ତୁମେ ଅନ୍ଯ କା'ର ଫଟା ମୋ କପାଳ ।

ମୋ ପ୍ରେମରେ ମୋହ ଥିଲା ଜାଣି ମୁଁ ନଥିଲି, 

ସ୍ବାର୍ଥୀ ଥିଲି ଆଶା ଥିଲା ପ୍ରାପ୍ତ ହେବି ବୋଲି ।

ବୁଝାଇଲ ଯେବେ ତୁମେ ପ୍ରେମ ପରିଭାଷା, 

ତୁଟିଗଲା ମୋହ ଦୂର କଲି ସବୁ ଆଶା ।

ସମ୍ମାନ ସହିତେ ମିଠା କଥା ଦୁଇ ପଦ, 

ଶୁଦ୍ଧ ପ୍ରେମେ ଥାଏ ସଦା ଅମୃତର ସ୍ବାଦ ।

ଇଚ୍ଛାଥିଲା ପ୍ରାପ୍ତ ହେବି ତୁମ ଯୌବନକୁ, 

ସମୟ ସ୍ରୋତରେ ବୁଝିଗଲି ଆଜି ତା'କୁ ।

ବୁଝିଲି ପ୍ରେମର ଅର୍ଥ ପର ଉପକାର, 

ପରମାର୍ଥୀ ବୋଲାଇବା ଜଗତରେ ସାର ।

ନିଜକୁ ପ୍ରଚୁର ଭଲପାଏ ଯୋଗୀ ସାଜି, 

ତୁମ ପ୍ରେମେ ସମର୍ପିତ ହେଲି ସଖୀ ଆଜି ।

ପ୍ରେମ ଭାବ ଥିବ ଯୁଗ ଯୁଗ ଯାଏଁ ସତୀ, 

ନ ବଞ୍ଚିବି ଚିରକାଳ, ଥିବ ଏକା ସ୍ମୃତି ।