ସ୍ମୃତି ତୁମେ ଯେବେ ଆସ

ସ୍ମୃତି ତୁମେ ଯେବେ ଆସ ମୋର ପାଶ

ମନ ସଜ ଫୁଟା ଫୁଲ

ଚହଟି ଛୁଟାଏ ଯେତେକ ମହକ

ମୋ ପାଇଁ ଅମୂଲ ମୂଲ ।

କେତେବେଳେ ପୁଣି ସାଜି ମରୁଦ୍ୟାନ

ମନର ତୃଷା ମେଣ୍ଟାଅ

କିପରି ବିଫଳୁ ସଫଳ ମଣିଷ

ହୃଦୟେ ଚେତାଇ ଦିଅ ।

ଆଉ କେବେ କେବେ ମନ ଅଗଣାରେ

ଝରାଇ ଦୁଃଖ ବରଷା

କଷ୍ଟ ଯନ୍ତ୍ରଣାରେ ଧୋଇ ତନମନ

ବୁଡାଇ ଦିଅ ମୋ ହଂସା ।

ମୋର ଜୀବନରେ ପ୍ରତି ମୁହୂର୍ତ୍ତରେ

ତୁମେ ସୁଖଦୁଃଖ ସାଥୀ

ବିନା ଆମନ୍ତ୍ରଣେ ଆସି ଫେରୁଥିବ

ହୃଦୟେ ଭରି ଶକତି ।

ତୁମ ସଙ୍ଗେ ଭାବ ଲାଗି ରହିଥିବ

ଥିବାଯାଏ ମୋ ଜୀବନ

ମିଠା ଖଟା ସ୍ବାଦ କରି ଆସ୍ବାଦନ

ଥିବି ପୂର୍ଣ୍ଣ ବା ଅପୂର୍ଣ୍ଣ ।