ଓଢଣୀ

ନାକଯାଏଁ ତାର ଓଢଣୀ ରହିଛି

ମାମୁଁ ଆଣନ୍ତି ଚଲାଇ ।

ଆଗକୁ ଚାହୁଁଛି ପଥ ଦିଶୁନାହିଁ

ବେଦୀମୁହାଁ ଅଛି ହୋଇ ।୧।

ନୂଆ ବୋହୁ ପରା ସାଜିଅଛି ସିଏ

ବିବାହ ଆଜି ତାହାର ।

ମୁଖ କେ ଦେଖିବ ଟାଣୁଛି ଓଢଣୀ

ଲାଲ ଛିଟ ରଙ୍ଗ ତାର ।୨।

ବସନ ଭୂଷଣ ଠାରୁ ଏ ଓଢଣୀ

ଲକ୍ଷେ ଗୁଣ ମହୀୟାନ ।

ଓଡ଼ିଆ ଘରର ମାନ ସନମାନ

ଲଜ୍ଜା ନାରୀର ଭୂଷଣ ୲୩।

ଚନ୍ଦର ଉଦିଆ ମୁଖଟି ଯାଇଛି

ଓଢଣୀ ଭିତରେ ରହି ।

ଅସୂର୍ଯ୍ୟଂପଶ୍ୟା ସେ ଥିଲା ସିନା ଆଗେ

ଏବେ ତ ସେକଥା ନାହିଁ ।୪।

ବୋହୁକୁ ଟିକିଏ ଦେଖିବା କହିଲେ

ଗାଁ ଲୋକମାନେ ଯେବେ ।

ଶାଶୁ ଆସି ଟିକେ ଓଢଣୀକୁ ଟେକେ

କହେ ଦେଖ ବୋହୁ ଏବେ ।୫।

ମୁହଁଚୁହାଁ ଦେଇ ବୋହୁକୁ ବିଦାୟ

ନିଅନ୍ତି ଘରୁ ଅତିଥି ।

ଓଢଣୀ ଭିତରେ ରହିଥାଏ ବୋହୁ

ଧନ୍ୟ ଆମର ସଂସ୍କୃତି ।୬।

ହତଶିରୀ ହୁଏ ଆଜି କିଏ କହେ

ଭିଡିଓ ହୋଇବ ଶୁଣ ।

ମୁଣ୍ଡରୁ ଓଢଣୀ କାଢିଦିଅ ଫଟୋ

ଉଠିବ ଏବେ ତକ୍ଷଣ ।୭।

ଓଢଣୀଟି ଥିଲେ କି ସୁନ୍ଦର ଦିଶେ

ବୋହୁ ଥରେ ଦେଖ ଆସି ।

ବିନା ଓଢଣୀରେ ଫୁଙ୍ଗୁଳା ଲପନ

ଲଜ୍ଜା ଯାଏ କାହିଁ ଭାସି ।୮।