ଅଧ୍ୟବସାୟ ସଫଳତାର ଚାବିକାଠି
ଅଧ୍ୟବସାୟ ସଫଳତାର ଚାବିକାଠି
ଯେତେ ସଫଳତା ମିଳଇ ଜୀବନେ
ତାହା ଚାବିକାଠି ଅଧ୍ୟବସାୟ
ବିଜେତା ଭାବରେ କେହି ବି ଗଣିତ
ସର୍ବଦା କର୍ମରେ ରଖିକି ଲୟ ।
ଅଧ୍ୟବସାୟୀଟେ ଅବିଶ୍ରାନ୍ତ ଭାବେ
ଉଦ୍ଯୋଗରେ ସିନା ଲାଗିପଡ଼ଇ
ବିନା ସଂକଳ୍ପରେ କେହି କ'ଣ କେବେ
ସଫଳତା ଶିଢ଼ି ଚଢ଼ି ପାରଇ ?
କର୍ମ ସାଧନାର୍ଥେ ସଂକଳ୍ପରେ ସ୍ଥିର
ଉଦ୍ୟମୀ କେବଳ ରହେ ସର୍ବଦା
ହେଲେ ବି ବିଫଳ ଅଧ୍ୟବସାୟିତ
ଦୃଢ଼ପ୍ରତିଜ୍ଞାରେ ସାଜଇ ମେଧା ।
କାହାର କଟୁକ୍ତି ଅବା ପରିହାସ
ଛୁଇଁ ନପାରଇ ତାହାର ମନ
ବ୍ରତୀ ଥାଏ ସଦା କର୍ତ୍ତବ୍ୟ କର୍ମରେ
ଧିଆନ କେବଳ ଲକ୍ଷ୍ୟ ପୂରଣ ।
ଶେଷେ ସଫଳତା ପାହାଚରେ ବସି
ଗାଇଉଠି ତା'ର ବିଜୟ ଗୀତ
ପାଲଟଇ ଆନ ପାଇଁ ନିଦର୍ଶନ
ହେଲା କେଉଁ ପରି ସେ ଅଭିପ୍ରେତ ?
ସେଥିପାଇଁ ନିଜ ସ୍ବାଧ୍ୟାୟ ବଳରେ
ଅଧ୍ୟବସିତଟେ ହୋଇ ଜୀବନେ
ପ୍ରଜ୍ଞାର ତାଲାକୁ ଖୋଲି ଜ୍ଞାନାଲୋକେ
ପୂର୍ଣ୍ଣ କରିଦିଅ ନିଜଠୁ ଆନେ ।