ରୁକ୍ମିଣୀଙ୍କ ଅମ୍ବିକା ସ୍ତୁତି

ଜୟ ଲୋ ଅମ୍ବିକା ମାତ ପର୍ବତ ନନ୍ଦିନୀ

ଭୀଷ୍ମକ ଦୁଲଣୀ ପଦେ ଜଣାଏ ଦୟିନୀ l

ନମଃ ମା' ସର୍ଵ ମଙ୍ଗଳା ସନ୍ତାନ ବତ୍ସଳା

ମଙ୍ଗଳମୟୀ ଉଦ୍ଧାରୁ ବୁଡ଼ିବାର ଭେଳା l

ଅମ୍ବିକା ଗୋଉରୀ ଉମା ମାଆ ଜଗଦମ୍ବା

ମାହେଶ୍ଵରୀ ଶଙ୍କରୀ କରୁଣାମୟୀ ଅମ୍ବା l

ତ୍ରେତୟାରେ ମାତେ ପୂଜି ଜନକନନ୍ଦିନୀ

ରାମ ବର ଦେଲୁ ଯାଚି ଶଙ୍କର ଘରଣୀ l

ଶଙ୍କଟତାରିଣୀ ମାଲୋ ବିପଦ ଭଞ୍ଜନୀ

କୃଷ୍ନେ ସମର୍ପିତା ପ୍ରାଣ ମୁହିଁ ଅଭାଗିନୀ l

ଭ୍ରାତା ଋକ୍ମୀ, ବରିଅଛି ଶିଶୁପାଳେ ବର

ଦେହ କି ଧରିବ ମାଆ ରୁକ୍ମିଣୀ ତୁମ୍ଭର l

ସତେ କି ଆସିବେ ନାହିଁ ଭୁବନ ସୁନ୍ଦର

ଇହ ପର କାଳେ ଶିରିପତି ପ୍ରାଣେଶ୍ୱର l

ସିଂହର ଗ୍ରାସ କି ଅବା ଶୃଗାଳ ଭୁଞ୍ଜିବ

ମାଆ ଥାଉ ବୈଦର୍ଭୀର ପ୍ରାଣ ରହିଥିବ l

ଦୟିନୀ ଶୁଣ ମା' ପଦେ ପଶିଲି ଶରଣ

ଜୀବନ ମୋହର ପଦେ କଲି ସମର୍ପଣ l

ଭୁବନମୋହିନୀ ମାଆ ଦୟିନୀ ଶୁଣିଲେ

ହରିଣୀନେତ୍ରାଙ୍କୁ ଆସି ହରି ହରିନେଲେ l

ଜୟ ଜୟ ମାଆ ଭଗବତୀ କାତ୍ୟାୟନୀ

ନମସ୍ତୁତେ ନମସ୍ତୁତେ ନମଃ ନାରାୟଣୀ l