ଲଙ୍କାରେ ରାମନାମ

ଜୟ ଜୟ ବାୟୁ ପୁତ୍ର ବୀର ହନୁମାନ

ବାୟୁବେଗରେ କରିଲ ସମୁଦ୍ରଲଂଘନ l

ରାମନାମ ତୁଣ୍ଡେ ଧରି ମଶକ ରୁପରେ

ନିଶଙ୍କ ପଶିଲ ଯାଇ ସ୍ଵର୍ଣ୍ଣ ଲଙ୍କାପୁରେ l

ଲଙ୍କିନୀ ପଥ ଓଗାଳେ ମାରି ବ୍ରହ୍ମ ମୁଥ

ଦେଖିଲ ରାକ୍ଷସ ନିଦ୍ରା ଗତ ଯୂଥ ଯୂଥ l

ସ୍ତିରୀ ପୁରୁଷ ସରବେ ହୋଇ ଉଲଗନ

ଶୋଇରହିଛନ୍ତି ଦେଖି ସୁଖରେ ସପନ l

ଅର୍ଦ୍ଧ ଯାମେ ବୁଲି ବୁଲି ଗଲ ସିନା ଥକି

ସନ୍ଧାନ ନମିଳେ କାହିଁ ଅଛନ୍ତି ଜାନକୀ l

ଭାସିଆସେ ଦୁରୁଁ କାହୁଁ ପ୍ରଭାତୀକୀର୍ତ୍ତନ

ବିସ୍ମୟ ଲଙ୍କା ପୁରରେ ପୁଣି ରାମନାମ l

ଦୁରେ ଦେଖି ଶ୍ରୀ ହରିଙ୍କ ସୁନ୍ଦର ମନ୍ଦିର

ଭକ୍ତପ୍ରବରଙ୍କ ପାଶେ ହୋଇଲ ହାଜର l

ଅତି ହର୍ଷେ କହନ୍ତି ସେ ଭକତଙ୍କ ନାହା

ଲଙ୍କାପୁରେ ଅଛି ଯଥା ଦନ୍ତମଧ୍ୟେ ଜିହ୍ୱା l

ରାବଣର ଭାଇ ମୋର ନାମ ବିଭୀଷଣ

ସଉଭାଗ୍ୟେ ପାଇଲି ମୁଁ ତବ ଦରଶନ l

କୁହ କୁହ ଆହେ଼ ଭକ୍ତାଗ୍ରଣୀ ରାମ ଦୂତ

ସତେକି ପ୍ରଭୁଙ୍କ ମୁହିଁ ପାଇବି ସାକ୍ଷାତ l

ଗାଢ଼ ଆଲିଙ୍ଗନେ ବିଭୀଷଣ, ହନୁମନ୍ତ

ଦୈବତେ ବର୍ଷନ୍ତି ସ୍ବର୍ଗୁ ପୁଷ୍ପ ପାରିଜାତ l

ମାଆ ବନ୍ଦିନୀ ଅଛନ୍ତି ଅଶୋକ କାନନ

ସନ୍ଦେଶପାଇ ଚଳିଲେ ଭକ୍ତ ହନୁମାନ l

ଜୟ ଶ୍ରୀରାମ ଜାନକୀ ଭକ୍ତ ବିଭୀଷଣ

ଜୟ ଆଞ୍ଜନେୟ ଜୟ ଅସାଧ୍ୟ ସାଧନ l