ପ୍ରଶ୍ନ ଓ ପ୍ରେମ

ପ୍ରଶ୍ନ ଆସେ ମୋର ମନରେ

ଖୋଜେ ଉତ୍ତର ତାର

ପ୍ରେମ ବୋଲି ନାମ ଯାହାର

ସିଏ କେଡେ ମଧୁର ।

ରୂପ ଛଟା ତାର କିପରି

ସ୍ଥିତି କେଉଁଠି ତାର 

କେଉଁଠୁ ଆସିଲା ସେ ପ୍ରେମ

କାହିଁ କରିଲା ଘର ।

ମଧୁର ଏ ପ୍ରେମ ଶବଦ

ରୂପ ଅନ୍ତର୍ନିହିତ 

ଆଖିକୁ ସେ ଦେଖା ନଯିବ

ଅନ୍ତର୍ଚକ୍ଷୁ ସୀମିତ  ।

ରୂପ ଛଟା ତାର ସବୁ ତା

ଅନୁଭବୀ ଜାଣଇ 

କଥାରେ ବୁଝାଇବା ଲୋକ

କହ ମିଳିବ କାହିଁ ।

ଜାତ ହେଲା ମନ ଭିତରୁ

ବସା ବାନ୍ଧିଲା ମନେ 

ନିବାସ କରିଲା ରହି ସେ

ତହିଁ ଅତି ଯତନେ ।

ପ୍ରେମାସ୍ପଦ ଯେବେ ମିଳିଲେ

ହୋଇଲେ ଏକାକାର 

ପ୍ରେମୀ ପ୍ରେମାସ୍ପଦ ମିଳନ

ଲାଗେ କେଡେ ମଧୁର ।

ସ୍ବର୍ଗୀୟ ଏ ପ୍ରେମ ବିକଳ୍ପ

ତାର ମିଳିବ କାହିଁ 

ଜୀବନ ଧରିବା ସହଜ

ପ୍ରେମ ବିନା ନୁହଇ ।

ହାଟ ବଜାରରେ ଏ ପ୍ରେମ

କାହିଁ ନହୁଏ ବିକା 

ପଢିଲେ ଏ ପାଠ ସୁନ୍ଦର

ହୁଏ ଜୀବନ ନୌକା ।

ଅଢେଇ ଅକ୍ଷର ପ୍ରେମଟି

ମନେ ନଧର ଆନ 

ପଣ୍ଡିତ ହୋଇବ ଏ ପ୍ରେମ

ପାଠ କର ପଠନ ।