ସ୍ମୃତି ଝରକାରୁ ମୁହଁଟି ତୁମର

ସ୍ମୃତି ଝରକାରୁ ମୁହଁଟି ତୁମର ଦିଶୁଥାଉ ନୂଆହେଇ,

ମନ ଆଇନାକୁ ପୋଛିଦେଇ ପୁଣି ରହିବି ତୁମକୁ ଚାହିଁ ।(ଘୋଷା )

କେବେ ଯଦି ଭାଙ୍ଗିପଡ଼େ ସେ ଆଇନା କାଚକୁ ଗୋଟେଇ ନେବି,

ସୁନା ଫରୁଆରେ ସେ କାଚଗୁଣ୍ଡକୁ ସାଇତି କରି ରଖିବି ।

ନୂଆ ଆଇନାରେ ନୂଆମୁହଁ ଆଉ କେବେ ବି ଦେଖିବି ନାହିଁ ।

ସ୍ମୃତି ଝରକାରୁ ମୁହଁଟି ତୁମର ଦିଶୁଥାଉ ନୂଆହେଇ,

ମନ ଆଇନାକୁ ପୋଛିଦେଇ ପୁଣି ରହିବି ତୁମକୁ ଚାହିଁ ।(1)

ତୁମହାତ ଲେଖା ପ୍ରେମ ପତ୍ରଟିକୁ ପଢ଼ୁଥିବି ନିତି ଖୋଲି,

ସେ ପତ୍ରଟି ଯଦି ଚିରିଯାଏ କେବେ ରଖିବି ଚନ୍ଦନ ବୋଳି ।

ତୁମେ ଛୁଇଁଥିବା ମୋ ହାତକୁ ଆଉ କେବେ ବି ଧୋଇବି ନାହିଁ ।

ସ୍ମୃତି ଝରକାରୁ ମୁହଁଟି ତୁମର ଦିଶୁଥାଉ ନୂଆହେଇ,

ମନ ଆଇନାକୁ ପୋଛିଦେଇ ପୁଣି ରହିବି ତୁମକୁ ଚାହିଁ ।(2)