ସ୍ମୃତି ବାଲିଘର

ସପନରେ ସିନା ମିଛଟିଏ ତୁମେ

ସତରେ ତୁମକୁ ଦେଇଛି ମନ

ମନେ କି ପଡୁନି ବୋହୁଚୋରୀ ଖେଳ

ବାଉଳା କରୁନି ହଜିଲା ଦିନ ।

ଷଢେଇ ଖପରା ବାଲିର ଚୁଲିରେ

ଭାତ ଡାଲି ଭଜା ତିଅଣ କରି

ସଜନା ପତରେ ବାଢି ଦେଉଥିଲ

ଖାଉଥିଲି ପରା ପେଟକୁ ଭରି ।

ହଜି ଯାଇଛି ସେ ସୁନାର ଦେଉଳ

ବାଲିରେ ମୋ ପାଇଁ ତିଆରି ଥିଲ

ବଉଳ ମୂଳର ଚାନ୍ଦିନୀ କାହାଣୀ

ସତେ କଣ ମନୁ ପାଶୋରି ଦେଲ ।

ସ୍ମୃତି ହଜିନାହିଁ ଆଖି ଶୁଖିନାହିଁ

ତୁମକଥା ଭାବି ବିତୁଛି ଦିନ

ଲୁହରେ ଲେଖୁଛି ଆତ୍ମକଥା ମୋର

ତଥାପି ବୁଝୁନି ଅବୁଝା ମନ ।