ସ୍ମୃତି ଅପାଶୋରା

ସ୍ମୃତି ସବୁକୁ ସାଇତି ରଖିଛି

ମନ ଆଲବମ୍ ରେ

ସ୍ନେହ, ପ୍ରେମର ବନ୍ଧେଇ ଭିତରେ,

କେବେ ଆସି ନିରୋଳାରେ

ନୀରବରେ ପରସ୍ତ ପରସ୍ତ ଲେଉଟେଇ

ପରଖି ଦେଇଯାଅ ସେସବୁକୁ।

ପୁରୁଣା ବୋଲି କ'ଣ କିଛି ଗୋଟେ ଥାଏ କି!!

ତୁମେ ଯାହାକୁ ପୁରୁଣା କୁହ,

ମୁଁ ତାକୁ ସ୍ମୃତି କୁହେ

ଯିଏ ବଞ୍ଚିବାକୁ ସାହା ହୁଏ

ରାହା ଦିଏ,

ସ୍ବଳ୍ପ ସମୟ ପାଇଁ ହେଉ ପଛେ

ଓଠରେ ଆଙ୍କେ ହସ ଚେନାଏ,

ଆଉ କିଛି ଦିନ ବଞ୍ଚିବାକୁ 

ଖୋରାକ ଯୋଗାଏ।

ଆଖି ଆଇନାରେ ଝଲସି ଗଲେ

ଲାଗେ ସତେ ଆଉ ଥରେ

ଜିଇଗଲି କି ସେଇ ସବୁ ମୁହୂର୍ତ୍ତ!!

ସ୍ମୃତି ଯେବେ ଦୁଃଖ ଦିଏ 

ତାକୁ ପାଶୋରିଦେବା ଭଲ,

କିନ୍ତୁ ଏ ମନ ଚାହିଁଲେ ବି

ପାଶୋରି ପାରେନା....

ରହିଯାଏ ଚିରଦିନ ପାଇଁ

ଭୁଲିହୁଏନା..

ସ୍ମୃତି ପରା ଅପାଶୋରା...

ଦୁଃଖଦ ହେଉ ବା ସୁଖଦ

ହୃଦରେ ସାଇତି ରୁହେ ଜୀବନ ସାରା...