ସ୍ମୃତି ଆଇନାରେ
ସ୍ମୃତି ଆଇନାରେ
ସ୍ମୃତି ଆଇନାରେ ପ୍ରତିଛବି ଭାସେ
ଉଜ୍ଜୀବିତ ହୋଇ ଆଜି ;
ଆହେ ପ୍ରାଣପ୍ରିୟ କାହିଁ ଗଲ କୁହ
ଆଉକି ପାଇବି ଖୋଜି ।
ସ୍ମୃତି ଫରଦରେ ଅଲିଭା ଅକ୍ଷରେ
ଲେଖାଅଛି ତୁମନାଁଆ ;
ଝୁରିବାଟା ସାର ମୋର ଅଭିସାର
ମନେପଡେ ପ୍ରୀତିଛୁଆଁ ।
ଦୂର ବିଦେଶରେ ଥିଲହେ ଖୁସିରେ
କର୍ମେ ଆଗଭର ହୋଇ ;
କରୋନା ରାକ୍ଷସ କଲା ସର୍ବନାଶ
ତୁମକୁ ନେଲା ଛଡାଇ ।
ଦୁର୍ବିସହ ମୋର ଅସହାୟ ଜୀବନ
ଆଖିରୁ ସୁଖୁନି ଲୁହ;
ବୈଧବ୍ଯ ବେଦନା ଦଉଛି ଯାତନା
ହୃଦୟେ ଭରିଛି କୋହା ।
କୁନା ମୁନି ନିତି ମୋତେ ପଚାରନ୍ତି
ବାପା କାହିଁ ଗଲେ ମାମା ;
କିଉତ୍ତର ଦେବି ତୁମେ କୁହ ଆଜି
କେକରିବ ମୋତେ କ୍ଷମା ।
ବଞ୍ଚିବା ମରିବା ମୋପାଇଁ ସମାନ
ଜୀବନଟା ଲାଗେ ତୁଚ୍ଛ;
କେମିତି ବଞ୍ଚିବି ଏକାଏକା ସାଥୀ
ଦୁନିଆଁଟା ଲାଗେ ମିଛ ।
ହୀନିମାନ ହୋଇ ନିଇତି କାନ୍ଦୁଛି
ଅଧାବାଟେ ଛାଡିଗଲ ;
କୁହ ପ୍ରାଣପ୍ରିୟ କେ'ପୋଛିବ ଲୁହ
ଜୀବନ୍ତ ମରଣ ଦେଲ ।
ସ୍ମୃତିଚିତ୍ର ସବୁ ଭାସିଉଠେ ବାବୁ
ଆଉକି ଆସିବ ଫେରି ;
ସେଇ ସୁଖଦିନ ଅଭୁଲା ସ୍ମରଣ
କଲା କିଏ ଜାଣି ଚୋରି ।
ସ୍ମୃତିଚିତ୍ର ଦେଖି କହିଁକି ବଞ୍ଚିବି
ତୁମେ କୁହ ପ୍ରାଣନାଥ;
ନେଇଯାଅ ମୋତେ ଯିବି ତୁମପାଶେ
ହଉଛି ମୁଁ ହତସନ୍ତ ।
ହାୟରେ ବିଧାତା କଲୁତୁ ହୀନସ୍ତା
ସ୍ମୃତିକୁ ଝୁରୁଛି ଖାଲି ;
ନେଇଯାଆ ମୋତେ ମୋ ପ୍ରିୟପାଶେ
କହୁଛି ହୃଦୟ ଖୋଲି ।।