ସମ୍ପର୍କର ନଈ ତୀରେ

ପ୍ରେମକୁ ପ୍ରସାରି ମିଳନ ବିସ୍ତାରି

ଅର୍ଘ୍ୟ ଦେଲ ସମ୍ପର୍କରେ

ସମ୍ପର୍କର ସେତୁ କେଉଁଠି ଫାଟିଲା

ରହିଗଲି ବିରହରେ

ଏକି କଲ ତୁମେ ପ୍ରୀତିର ପ୍ରାନ୍ତରେ

ସମ୍ପର୍କର ନଈ ତୀରେ।

ପ୍ରୀତିର ମଳୟ ହେଲା ବିପରୀତ

ସବୁ କିଛି ଗଲା ହଜି

ମୋ ଜୀବନ ମୋତେ ଦେଇଗଲା ଯାହା

ଅଭୁଲା ସ୍ମୃତିରେ ଆଜି।

ଦୁର୍ବିସହ ଲାଗେ ନିଃସଙ୍ଗ ଜୀବନ

ମୃତ୍ୟୁର ପଥିକ ସାଜି

ତଥାପି କାହିଁକି ତୁମକୁ ମୁଁ ଖୋଜେ

ତୁମ ବିନା ଲାଗେ ତୁଛ

ତୁମେ ଥିଲ ସାଥୀ ଜୀବନ ସାରଥୀ

ବିଶ୍ଵାସର ବରଗଛ

ବଞ୍ଚିବା ବାସନା ବ୍ୟାହତ ହେଲାଣି

ଲୁଚି ଲୁଚି ଯାଏ ଲକ୍ଷ୍ୟ।

ଭିକାରୁଣୀ ମୁହିଁ ସମୟ ଦାଣ୍ଡରେ

ବୁଲୁଛି ମୁଁ ଏକା ଏକା

ହୃଦୟ ଦେଇଛି ପ୍ରୀତିର ସ୍ଵାକ୍ଷର

ନିୟତି ନିଷ୍ଠୁର ବାଧା

କର କାହିଁ ମୋତେ ଅବାଞ୍ଛିତ ଆଉ

ଦିଅ ମୋତେ ପ୍ରୀତି ଭିକ୍ଷା।

ମୋ ପ୍ରୀତି ନଇରେ ଉଛୁଳାଇ ଦେବି

ସରାଗରେ ପାଖେ ବସି

ପ୍ରପଞ୍ଚ ନୁହେଁ ମୋ ପ୍ରୀତିର ସିକଞ୍ଜ

ମୋତେ କାହିଁ କର ଦୋଷୀ

କଳଙ୍କ ନଥାଇ କଳଙ୍କ ବୋଳିଲେ

ତୁମେକି ହୋଇବ ଖୁସି।