ସମ୍ପର୍କ
ସମ୍ପର୍କ
ଯେତେ ବୁଝାଇଲେ ବୁଝୁନାହିଁ ଏହି ମନ ପ୍ରଶ୍ନ କରୁଛି ,
ସମ୍ପର୍କରେ ଆଜି କିଏ କାହାକୁ କେମିତି ପ୍ରତାରଣା ଦେଇଛି ?
ସମ୍ପର୍କ ଗଢିବା ନୁହଁଇ ସହଜ ,ନୁହେଁ କ୍ଷଣିକ ପାଇଁ ,
ଭାଙ୍ଗିଯାଏ ସିନା ସିଏ ,କିନ୍ତୁ କେବେ ଲିଭିଯାଏ ନାହିଁ |
ପିତା ପୁତ୍ରର ସମ୍ପର୍କ ନୁହେଁ ଅଭିନୟ ,ସିଏ ଆଶୀର୍ବାଦ ,
ତେବେ ,ଆଜି କାହିଁକି ସଂସାରରେ ପାଉଛି ଏତେ ଅପବାଦ ?
ଗର୍ଭରେ ଧରି ଯନ୍ତ୍ରଣା ସହି ଜନ୍ମ ଦିଏ ମାତା,
ସମ୍ପର୍କ ତାର ଅଭିନୟ ନୁହେଁ, ଏହା ଜାଣିଛି ବିଧାତା |
ତଥାପି ଦୁନିଆରେ ସେହି ମାତା ଆଜି ପର ହେଉଛି,
ସନ୍ତାନ ତାକୁ ଦୂର କରିଦେଇ, ସବୁ ସମ୍ପର୍କ କାଟୁଛି |
ପ୍ରଶ୍ନ କରେ ମାତା ନିଜକୁ, ମମତାର ଦେଇ ଦ୍ୱାହି,
ଅପବାଦ କାହିଁକି ପାଇଲା ସନ୍ତାନଠୁ, କେହିକି ପାରିବ କହି ?
ରଙ୍ଗମଞ୍ଚେ ଅଭିନୟ କରେ କଳାକାର, ବାର୍ତ୍ତା କିଛି ଦିଏ ,
ବୁଝିଲେ ତାହାକୁ ଦୁନିଆରେ କେବେ ସମ୍ପର୍କ ଛିନ୍ନ ନ ହୁଏ |
ଅଭିନୟ ସଙ୍ଗେ କଳାକାରର ସମ୍ପର୍କ ନିବିଡ଼ ଆଉ ସୁନ୍ଦର ,
କ୍ଷଣସ୍ଥାୟୀ ହେଲେ ମଧ୍ୟ ଲାଗେନାହିଁ କେବେ ଦାଗ ପ୍ରତାରଣାର |
ରଙ୍ଗମଞ୍ଚ ଏଠି ସଜ ହୋଇଥାଏ ସେହି ସମ୍ପର୍କ ପାଇଁ ,
ସଭିଏଁ ଦେଖନ୍ତି ଆନନ୍ଦ ନିଅନ୍ତି ମନକୁ ଖୁସି କରାଈ |
କଳାକାର ଏଠି ଅଭିନୟ କରି ଫୁଟାଏ ଓଠରେ ହସ ,
ଲୁହକୁ ଲୁଚାଇ ସୃଷ୍ଟି କରେ ସିଏ ସୁନ୍ଦର ପରିବେଶ |
ନିଜ ନିଜ ମଧ୍ୟେ ବିବାଦ ହୁଅଇ ସମ୍ପର୍କକୁ ନେଇ ,
ଯେବେ ହୃଦୟ କାନ୍ଦଇ ମିଥ୍ୟା ଆଉ ପ୍ରତାରଣା ପାଇ |
ତଥାପି ମଣିଷ ବୁଝି ପାରୁନାହିଁ କରୁଛି କେତେ ବାହାନା,
ସମ୍ପର୍କ ଭାଙ୍ଗିଦେଇ ଖାଲି ଅଭିନୟ କରେ ସିଏ ସିନା |
ପିତା ମାତା ଯିଏ ଜନ୍ମ ଦେଲେ ଗଢିଲେ ସମ୍ପର୍କ ,
ଅହଙ୍କାରୀ ହୋଇ ଛଳନା କରି ସନ୍ତାନ କରେ ତର୍କ |
ପାଟି ପତ୍ନୀର ସମ୍ପର୍କ ସାତ ଜନ୍ମକୁ ଭୁଲିଛି ସିଏ ,
ଉନ୍ମତ ହୋଇ ପଚାରେ,ପ୍ରତାରଣା ତାକୁ ଦେଇଛି କିଏ ?
କଳାକାରର ଅଭିନୟ ଦେଖି ବେଳେ ବେଳେ ଭାବୁକ ହୁଏ,
ମନେ ମନେ ଖାଲି ଭାଙ୍ଗିଥିବା ସମ୍ପର୍କକୁ ସିଏ ଖୋଜୁଥାଏ |
ଭୁଲିଯାଏ ଯେବେ ଛାଡ଼ିହେବ, ଏହି ମିଥ୍ୟା ଚାଳନାର ଅଭିନୟ ,
ତେବେ ସୁରକ୍ଷିତ ହେବ ସମ୍ପର୍କ ତୁଟିବ ସବୁ ସଂଶୟ |