ସମ୍ପର୍କ
ସମ୍ପର୍କ
ସମ୍ପର୍କ ନୁହଇଁ ବାଲିଘରଟିଏ
ପବନରେ ଭାଙ୍ଗିଯିବ,
ସମ୍ପର୍କ ନୁହଇଁ ସକାଳ କୁହୁଡି
କ୍ଷଣିକରେ ଉଭେଇବ |
ସମ୍ପର୍କର ଗ୍ରନ୍ଥି ହୁଏ ଚିରନ୍ତନୀ
ଅନାବିଳ ପ୍ରୀତି ଥିଲେ,
ନିକଟରେ ଅବା ବହୁ ଦୂରେ ଥିଲେ
ମନେ ପ୍ରତିବିମ୍ବ ଖେଳେ |
ସମ୍ପର୍କଟା ନୁହେଁ ମଶାଣୀର ଜୁଇ
ଜଳିଗଲେ ସରିଯିବ,
ମଲାପରେ ମଧ୍ୟ ହୃଦୟ କନ୍ଦରେ
ନିରବେ ବାହୁନୁଥିବ |
ବଞ୍ଚିବାରେ ସୁଖ ମିଳିଥାଏ ପରା
ଥିଲେ ପ୍ରିୟଜନ ଶ୍ରଦ୍ଧା,
ନିଃସଙ୍ଗ ଜୀବନ ଯନ୍ତ୍ରଣା ଜର୍ଜର
ରହେ ମିଳନର କ୍ଷୁଧା |
ଯେଉଁ ପରିବାରେ ସ୍ନେହ ମମତାରେ
ସମ୍ପର୍କର ମଧୁ ଝରେ,
ବିଭୁଙ୍କ ଆଶିଷ ଝରୁଥାଏ ସଦା
ବଇକୁଣ୍ଠ ସୁଧା ଭରେ |
ପିତାମାତା ଭାଇ ଭଗ୍ନୀ ପତ୍ନୀ ସହ
ଅତୁଟ ବନ୍ଧନ ରହେ,
ଭାଗ୍ୟବାନ ସିନା ସିଏ ଦୁନିଆରେ
ସଦା ହସ ବାଣ୍ଟୁଥାଏ |
ଜୀବନ ନଈର ରାସ୍ତା ଅଙ୍କାବଙ୍କା
ଏକା ଯିବା କଷ୍ଟମୟ,
ସମ୍ପର୍କର ହାତ ବିପଦେ ମିଳଇ
ନରହେ ହାରିବା ଭୟ |
ମଧୁର ସମ୍ପର୍କ ପାଶୋରାଇ ଦିଏ
ଜୀବନର ଅବଶୋଶ,
ନୂତନ କାମନା ସଞ୍ଚରାଇ ଦିଏ
ବଞ୍ଚିବାର ଅଭିଳାଷ |
ସମ୍ପର୍କରେ ଆସେ ବେଳେ ବେଳେ ଝଡ଼
ଅଦିନିଆ ମେଘ ପରି,
ହୁଏ ବୁଝାମଣା ପ୍ରୀତି ରହିଥିଲେ
ଅନୁରାଗ ଆସେ ଫେରି |
ସମ୍ପର୍କ ସତେ କି ସ୍ୱର୍ଗୀୟ ସୁଷମା
ହୃଦୟକୁ ମୋହିଥାଏ,
କ୍ଷଣିକ ଭଙ୍ଗୁର ହେଲେ ବି ଜୀବନ
ସ୍ମୃତି ହୋଇ ବଞ୍ଚିରହେ |