ସମ୍ପର୍କ
ସମ୍ପର୍କ
ସମ୍ପର୍କ ଡୋରିରେ ଵନ୍ଧା ପରସ୍ପରେ
ସଂସାରେ ସକଳ ପ୍ରାଣୀ
ଧରିତ୍ରୀ ଵକ୍ଷରେ କେ ରହି ପାରିଵ
ସମ୍ପର୍କକୁ ତୁଚ୍ଛ ମଣି ।
କୀଟ ଠୁ ଆରମ୍ଭି ଵ୍ରହ୍ମ ପରିଯନ୍ତେ
ଵନ୍ଧା ସମ୍ପର୍କ ଫାଶରେ
ଅନାବିଳ ପ୍ରେମ ମମତା ବନ୍ଧନ
ଥାଏ ସମ୍ପର୍କ ଭିତରେ ।
ମାଆ ସହିତ ଯେ ଶିଶୁର ସମ୍ପର୍କ
ଗର୍ଭ ଅଵସ୍ଥାରୁ ଥାଏ
ଯେତେ କଷ୍ଟ ହେଲେ ମାଆ କ'ଣ ସେହି
ଶିଶୁ ଠୁ ଅଲଗା ହୁଏ ।
କ୍ଷୀର ସହ ନୀର ସମ୍ପର୍କ ମଧୁର
କିଏ ଅବା ଜାଣେ ନାହିଁ
କ୍ଷୀରଠୁ ନୀରକୁ କେହି କେବେ କୁହ
ଅଲଗା କରି ପାରଇ ।
ଜଳ ସହ ମୀନ ସମ୍ପର୍କ ଅଭିନ୍ନ
ଅତୁଟ ଵନ୍ଧନ ସେହି
ଜଳର ବିହୁନେ ମୀନ କେତେ ଦିନ
ଜୀବିତ ପାରିବ ରହି ।
ସମ୍ପର୍କ ଗୋଟିଏ ସୂକ୍ଷ୍ମ ସୁତା ଖିଅ
ସର୍ବଦା ରଖ ସମ୍ଭାଳି
ଛଳନା, କପଟ, ଅବିଶ୍ବାସ ଥିଲେ
ସମ୍ପର୍କ ପଡିଵ ଟଳି ।
ସମ୍ପର୍କ ପାଖରେ ଧନୀ ନିର୍ଦ୍ଧନର
ପ୍ରଭେଦ ନ ଥାଏ କିଛି
ଦ୍ଵାରିକାର ରାଜା ସମ୍ପର୍କ ମୋହ ରେ
ସଖା ପାଦ ପ୍ରକ୍ଷାଳନ୍ତି ।
ଦୂର କି ନିକଟ ସମ୍ପର୍କରେ ଫାଟ
କେବେ ସୃଷ୍ଟି କରେ ନାହିଁ
ଚନ୍ଦ୍ର, କଇଁ ମଧ୍ୟେ ଅଭେଦ୍ୟ ସମ୍ପର୍କ
ଯୁଗ ଯୁଗ ଅଛି ରହି ।