Library
Profile
ସମ୍ପର୍କ ସଉଦା
ସମ୍ପର୍କ ସଉଦା
ନିତି ଗଢ଼ା ହୁଏ ସପନ ସହର
ନିତି ପୁଣି ଭଙ୍ଗା ହୁଏ
ସମ୍ପର୍କଟା ଏଠି କ୍ଷଣିକ ମାତର
ତାକୁ ବା' ବୁଝୁଛି କିଏ ।
ସମ୍ପର୍କର ଜନ୍ମ ମଧୁରୁ ହୋଇଣ
ବିଷରେ ହୁଅଇ ଶେଷ
ନିଶ୍ୱାସ ରଜ୍ଜୁ ଟି' ସୂତା ଖିଅ ହେଲେ
ମନେ ଆସେ ଅବସୋସ ।
ସମ୍ପର୍କର ମାନେ ଯିଏ ବୁଝି ଥାଏ
ଝଡ଼ ଝଞ୍ଜା ସବୁ ସହେ
ସମ୍ପର୍କକୁ ଯିଏ ଖେଳଣା ଭାବେ ଟି'
ନଦୀ ଜଳ ପରି ବହେ ।
ମିଛ ମାୟା ଏହି ସଂସାର ବୁକୁରେ
କେହି ନୁହେଁ ତ' କାହାର
ଆଜି କୋଳାହଳ ଆନନ୍ଦ ମୁହୂର୍ତ୍ତ
କାଲି ଶୁଭେ ହାହାକାର ।
ରକତ ହେଉନି ରକତର ଯେବେ
ଅନ୍ୟଠୁ ଆଶା ନ' କର
ସମୟକୁ ଦିନେ ସଉଦା କରିବେ
କେତେ ନେଇଛ ତାଙ୍କର ।
କଷି
ହୁଏ ନାହିଁ ଜୀବନ ଗଣିତ
ଭାରି କଷ୍ଟିଆ ସେ' ପାଠ
ଥରେ କଷି ଦେଲେ ଅଙ୍କା ବଙ୍କା ଅଙ୍କ
ସମ୍ପର୍କରେ ହୁଏ ଫାଟ ।
ଯାହା ଭାଙ୍ଗି ଯାଏ ଯୋଡି ହୁଏ ନାହିଁ
ପଡି ରୁହେ ଅବଶେଷ
ଅତୀତ ନଭରୁ ଚାନ୍ଦ ଉଇଁଲେ ବି'
କଇଁର ମେଣ୍ଟେନା ଶୋଷ ।
ବୋହିଗଲା ପାଣି ଫେରି ତ' ଆସେନା
ଫେରେ ନାହିଁ ଯଉବନ
ବିତିଲା ଜାମିନୀ ମଉଳା କାମିନୀ
କରେ ନାହିଁ ଅଭିମାନ ।
ଝଡି ଝଡି ଯାଏ ମଜ୍ଜାରୁ ମାଉଁସ
ସମ୍ପର୍କକୁ ଭେଟି ଦେଇ।
ତଥାପି ସେଥିରେ ମନ ଭରେ ନାହିଁ
ଜୀଅନ୍ତା ଚିତାରେ ଥୋଇ ।
ସମ୍ପର୍କର ଅର୍ଥ ବଡ଼ ଯେ' ଗଭୀର
ନୁହେଁ ବାଲି, ମାଟି, ଘର
ଯେତେ କାଟିଲେ ବି' ଶବ୍ଦ କରେ ନାହିଁ
ଭାବିକି ଅତି ନିଜର ।
