*🙏ସ୍ୱାଗତମ୍ ଦେବଶିଳ୍ପୀ🙏**(କବୀ

ନୀଳ କନ୍ଦରରେ ବିଜେ କରିଥିଲ

  ମାନବ ରୂପକୁ ଧରି।

ନିଜ ହାତରେ ତ' ନିଜକୁ ଗଢିଲ

  ସବୁ ମାୟା ଯେ' ତୁମରି।

ବିଶ୍ୱକର୍ମା ନାମେ ପୂଜିତ ହୋଇଲ

  ଭାଦ୍ରବର ସଂକ୍ରାନ୍ତିରେ।

ଶଙ୍ଖ, ଚକ୍ର, ଗଦା, ପଦ୍ମକୁ ଧରିକି

  ଭିନ୍ନ ନାମ ଏ' ମହୀରେ. ।

ଶୂନ୍ୟବ୍ରହ୍ମ, ଦାରୁବ୍ରହ୍ମ, ନିରାକାର

  ଆଦି, ଅନ୍ତ ଏ' ବିଶ୍ୱର।

ଦଶ ଅବତାର ରୂପକୁ ଧରିଲ

  ତୁମେ ଲୀଳାର ଠାକୁର।

ତୁମେ ହିଁ' ସୃଷ୍ଟି ତୁମେ ହିଁ' ସ୍ରଷ୍ଟା ଅଟ

  ଏ' ସୁନ୍ଦର ଜଗତର।

ତୁମ ଆଗମନେ ଧରଣୀ ହସୁଛି

  ସ୍ୱାଗତ ପ୍ରଭୁ ତୁମର।

ଗଢିଥିଲ ଯେଉଁ ସୁରମ୍ୟ ଜଗତ

  ତାହା ଆଜି ଇତସ୍ତତଃ।

ନୂତନ ନିର୍ମାଣ କର ମହାବାହୁ

  ବିପଦେ ଆଜି ଭକତ।

ସକଳ ଘଟରେ ତୁମେ ବିଦ୍ୟମାନ

  ଚେତନା, ଚିନ୍ତନ ନେଇ।

ସର୍ବ ପ୍ରାଣେ ପ୍ରଭୁ ଭରି ଦିଅ ତୁମେ

  ସର୍ଜନା ନୂତନ ପାଇଁ।

କେତେ ଯେ' ମନ୍ଦିର କେତେ ଅଟ୍ଟାଳିକା

  ସବୁ ଗଢ଼ା ଏ' ସଂସାରେ।

ତୁମରି ଆସିଷରେ ଅନେକ ଶିଳ୍ପୀ

  ବଞ୍ଚନ୍ତି ଏହି ପେଶାରେ।

ଧର୍ଯ୍ୟ, ଶକ୍ତି ତାଙ୍କ ମନେ ଭରି ଦିଅ

  ଜୀବନର ପ୍ରତି କ୍ଷେତ୍ରେ।

ଦୀର୍ଘାୟୁ ସେ' ହୋଇ ନିତି ଚାଲୁଥିବେ

  ଅନ୍ୟର ମଙ୍ଗଳ ଅର୍ଥେ।

କରୁଛି ଜୁହାର ଆହେ ଦେବ ଶିଳ୍ପୀ

  ମାନବ ରୂପେ ଈଶ୍ୱର।

ତୁମ କରୁଣାରୁ ଜଗତ ହସୁଛି

  ତୁମେ ସ୍ରଷ୍ଟା ଏ' ବିଶ୍ୱର।

ନୟନର ଜଳେ ପାଦ ଧୋଇ ଦେବି

  ଅର୍ପିବି ହୃଦ କମଳ।

ଜପ, ତପ, ଧ୍ୟାନ କିଛି ଜାଣି ନାହିଁ

  ଘେନ ପ୍ରଣତି ମୋହର ।