ଲାଇବ୍ରେରୀ
ପ୍ରୋଫାଇଲ୍
ସମ୍ପର୍କ - ଲୁହ
ସମ୍ପର୍କ - ଲୁହ
1 min
125
ଆଖି ସହ ଲୁହର ସମ୍ପର୍କ
ଯେପରି ବାଦଲ ସହ ବର୍ଷାର
କେବେ ଝରିଯାଏ କେବେ ଶୋଷିନିଏ
ଲୁହ ଝରିଯିବାର ଦୁଃଖଠୁ
ବଳେଇଯାଏ ଝରିନପାରିବାର ଦୁଃଖ
ଲୁହ କେବେ ଆଶାରଖେ
ଅନ୍ୟ କାହାର ଦୃଷ୍ଟିକୁ
କେବେପୁଣି ବିଫଳ ହେଉଥାଏ
ଆତ୍ମଗୋପନର ପ୍ରୟାସ କରୁକରୁ
କେତେବେଳେ ଲୁହକୁ
ଜଡେଇନିଏ କେଉଁ
ସମ୍ବେଦନଶୀଳ ପଣତ
ନିଜ ପଣତ ବି
କେବେ ସ୍ତବ୍ଧହୁଏ
ଲୁହକୁ ବହିବାକୁଦିଏ ନିରତ
କିଛି ଲୁହ ଶୋଷିନିଏ ଆଖି
କିଛି ପିଏ ଓଠ
କିଛି ଲୁହର ଅଲିଭାଦାଗ
ଲାଖିରହେ ଆଖିତଳେ
କିଛି ହୃଦୟକୋଣରେ
ଲୁହଟୋପେ ମୁକ୍ତା ପାଲଟୁଥାଏ
କେବେପୁଣି ଦରଦୀ ପାପୁଲିରେ
କୋଟରଗତ ପରଳମଡା ଆଖିର
ବିନ୍ଦୁଏ ଲୁହ
କେତେ ବେଦନାକ୍ତ
ଯେମିତି ଅସହାୟ
ମଣିଷର ସାନ୍ଧ୍ୟ ବୟସ
ଲୁହ କେବେ ସୁଖର
କେବେ ଦୁଃଖର
କେବେ ଛଳନାର
କେବେ ଅଭିନୟର
ଦୁଃଖରେ ସୁଖରେ ଲୁହଟୋପେ
ଏକାନ୍ତ ନିଜର
ଧାରେ ହସ ସହ ଯେବେ
ମିଶିଯାଏ ଦୁଇଟୋପା ଲୁହ
ସାରାଟା ସଂସାର ପାଲଟେ
ଶାଶ୍ୱତ ଅମୀୟ
ପବିତ୍ର ହସଧାରେ
ଦେବତାର ଆଦର ଉପହାର
ବିନ୍ଦୁ ବିନ୍ଦୁ ଲୁହର ମାଳ
ଜୀବନଗଳାର ଅମୂଲ୍ୟ ହାର ।
