ସମାନ ଯେ ପୁଅ-ଝିଅ
ସମାନ ଯେ ପୁଅ-ଝିଅ
ଝିଅ ଘରୁ ଏବେ ଫେରୁଅଛି ମୁହିଁ
ନାତୁଣୀ ହୋଇଛି ମୋର ,
ଭାରି ଗୁଲୁଗୁଲି-ଜହ୍ନଭଳି ତୋଫା
କଅଁଳିଆ ମୁହଁ ତା'ର ।
ଡାକତର ବାବୁ କହିଛନ୍ତି ଦେଖି
ଭଲଛନ୍ତି ମାଆ-ଛୁଆ ,
ମାନି ଚଳିଛନ୍ତି ପରାମର୍ଶ ସବୁ
ଦେଇଥିଲି ଯାହା ଯାହା ।
ଗୁରେଇ ମାଆର ମନଊଣା ଜାଣି
ବୁଝେଇଲେ ଦିଦି ଯେତେ ,
ଆମକୁ ଦେଖୁନ ଝିଅହୋଇ କରି
ଜୀବନ ରଖୁଛୁ କେତେ !
ଆଜିକାଲି ସବୁ ଶିକ୍ଷା-ଦୀକ୍ଷାରେ ତ
ଝିଅମାନେ ଧୂରନ୍ଧର ,
ଜୋଇଁ କହୁଥିଲେ-'ଲକ୍ଷ୍ମୀ ଆସିଗଲେ
ପୂରି ଉଠିବ ମୋ ଘର । '
ସତକଥା ଇଏ ଆଜିର ଯୁଗରେ
ସମାନ ଯେ ପୁଅ-ଝିଅ ,
ଭଲଭାବେ ତାକୁ ଗଢ଼ି ତୋଳିଲେ ସେ
ହୋଇବ ସବୁରି ପ୍ରିୟ ।
ବାପା,ମାଆ ସହ ଗାଆଁଭୂଇଁର ବି
ଝିଅଟି ରଖିବ ନାଆଁ ,
ତୁଚ୍ଛାଟାରେ ମୁହିଁ ମନ ଊଣାକରି
ଏବେଠୁ ରହିବି କିଆଁ !!