ସକାଳର ପ୍ରତୀକ୍ଷାରେ
ସକାଳର ପ୍ରତୀକ୍ଷାରେ
ତୁମେ ସଖୀ ମୋର ଆଖିର ପଲକ,
ମୋ ହୃଦୟ ତଳ ଜୋଛନା ଧାର,
ତୁମପାଇଁ ସଖୀ କବିତାରେ ମୋର
ନିତି ମୁଁ ଦିଅଇ ନୂତନ ସ୍ୱର I
ଏଡିକି ମନେଇ ଝିଅଟିଏ ତୁମେ
ସବୁ ବୁଝି ପୁଣି ଅବୁଝା ହୁଅ
ପ୍ରୀତି ନିର୍ଝରିଣୀ ପାଦଦେଶେ ବସି
ମନ ଭାବନା ମୋ ଭସାଇ ଦିଅ I
ଆଖିରେ ଆଖିରେ ପ୍ରେମର ଅଞ୍ଜନ
ପିନ୍ଧାଇ ଦେଇଛ ଯତନ କରି
ତୁମରି ସ୍ମରଣେ ଜୁଆରିଆ ମନ
ଖୋଜୁଥାଏ ତୁମ ପ୍ରଣୟ ବାରି I
ମନ ଗହନରେ ପଲ୍ଲବି ଉଠିଲେ
ତୁମରି ପ୍ରେମର ବିଶାଳ ତରୁ
ମନ ଖୋଜି ହୁଏ ତୁମରି ସାନ୍ନିଧ୍ୟ
ତୁମେ କିନ୍ତୁ ସାଜ ଅଟଳ ମେରୁ I
ତୁମ ପ୍ରତିକ୍ଷାରେ ମାଟିପିଣ୍ଡଟେ ମୁଁ
ପଡିଛି ଏଇଠି ଅନନ୍ତ କାଳ
ତୁମ ପରଶରେ ଘୁ଼ଞ୍ଚିବ ଅନ୍ଧାର
ମୋ ପାଇଁ ଆସିବ ନୂଆ ସକାଳ I