ସଜଳ ସ୍ମୃତି
ସଜଳ ସ୍ମୃତି
ମନେପଡେ ସାଥୀ ଆଦ୍ୟ ଆଷାଢ଼ର
ବିବାହ ଶୁଭ ଲଗନ
ସାକ୍ଷୀ ରଖି ଅଗ୍ନି ଦଶ ଦିଗପାଳ
ହେଲେ ଏକ ମନପ୍ରାଣ ।
ସାତଘେରା ଚାଲି ବେଦୀ ପ୍ରଦକ୍ଷିଣ
ବିବାହ ପାଣିଗ୍ରହଣ
ବଧୂ ଆଭୁଷଣେ ସବାରୀରେ ବସି
ସୁକନ୍ୟା ଅନୁଗମନ ।
ଚଉଠି ରାତିରେ ସଜବାଜ ହୋଇ
ଦିଶୁଥିଲ ଜହ୍ନ ପରି
ଚାତକ ପରାଏ ବରବେଶେ ମୁହିଁ
ଲଭିଥିଲି ସୁଧା ବାରି ।
ତୁମ ସାହଚର୍ଯ୍ୟ ସହ ଅବସ୍ଥାନ
ପ୍ରେମ ପ୍ରୀତି ଅନୁକ୍ଷଣ
ଭରିଛି ଜୀବନେ ଉତ୍ସାହ ଆନନ୍ଦ
ସରଜିଛି ନୂଆ ପ୍ରାଣ ।
ଛାଇ ପରି ତୁମେ ରହିଛ ମୋ ସାଥେ
ସୁଖଦୁଃଖେ ପ୍ରିୟତମା
ଭୁଲିଛ ନିଜର ମାତା ପିତା ଭ୍ରାତା
ପତିପ୍ରାଣା ଅନୁପମା ।
ତୁମେ ଆଶାତରୀ ନଉକା ନାୟିକା
ଅସହାୟ ମୁଁ ନାଉରୀ
ସହଧର୍ମିଣୀ ଗୋ ତୁମ ସହଯୋଗେ
ପଙ୍ଗୁ ହୁଏ ଭବୁ ପାରି ।
ବିବାହ ବାର୍ଷିକୀ ଶୁଭ ଅବସରେ
ପରିଣତ ବୟସରେ
ସଜାଇବା ଆସ ସ୍ମୃତିକୁ ସଜଳ
ପୁଷ୍ପଗୁଚ୍ଛେ ସୁମଧୁରେ ।
------