ସଜ କରି ଦିଅ ଘରଣି ରାଣୀ

ସଜ କରି ଦିଅ  ମୋ ଘରଣି ରାଣୀ

     ଯିବି ମୁଁ ବିହନ ବୁଣି.

ଆଜି ପରା ଦିନ  ଅକ୍ଷୟ ତୃତୀୟା

     ବଡ଼ ପରବ ତ ପୁଣି. l

ବଇଶାଖ ମାସ ଶୁକଳ ତୃତୀୟା

     ବରଷକେ ଗୋଟେ ଦିନ.

ଶୁଭ ମୁହୂର୍ତ୍ତର  ବିଗୁଲ ବଜାଇ

     ଧରା ପୃଷ୍ଟେ ଅବତୀର୍ଣ୍ଣ l

ବୀର ପର୍ଶୁରାମ  ଭକ୍ତ ଜୟଦେବ

     ଏ ଦିନ ଜନମି ଥିଲେ

ରଥ ଅନୁକୂଳ  ଚାଷ ଅନୁକୂଳ

     ହୁଏ ଧରଣୀ ବୁକୁରେ. l

ସଜ କର ମୋର  ଅନୁକୂଳ ସଜ

     ବେଳ ହେଉଛି ଉଛୁର

କାଳିଆ ବଳିଆ  ବଳଦ ବେକରେ

     ଯୋଚି ନେବି ମୁହିଁ ହଳ l

ବେତ ଟୋକେଇରେ  ଝୋଟି ଆଙ୍କି ଦେଏ

     ଅରୁଆ ଚାଉଳ ବାଟି

କେତେ ରକମର  କୋଳି ତୋଳି ଆଣି

     ତାଳ ସଜ ଦେଏ କାଟି l

ନୂଆ ଗଉଣିରେ  ଧାନ ଭରି ଦେଏ

     କୋଡ଼ି କୋଦାଳର ସଜ

ଲଙ୍ଗଳ ବଳଦେ  ଝୋଟି ଆଙ୍କି ଦେଏ

     ଅନକୁଳ ହେବ ଆଜ l

ଧୂପ ଦୀପ ଭୋଗ  ସଜେଇ ରଖିବୁ

     ଯିବି ବିଲେ ଧାନ ବୁଣି

ଫେରିଲା ବେଳକୁ  ଚାହିଁ ବସିଥିବୁ

     ପାଣି ଗରାଟିଏ ଆଣି l

କେତେ ନେତା ମନ୍ତ୍ରୀ  ରଖି ତାଙ୍କ କ୍ଷ୍ୟାତି

     କରିଥାନ୍ତି ଅନକୁଳ

ଧରଣୀ ମାଆ ତ  ଅନେଇ ବସିଛି

     ତା ଗେଲ୍ହାପୁଅ ଚାଷୀକୁଳ l

ଆଜି ଶୁଭ ଦିନେ  ଶୁଭ ଅନକୁଳ

     ଡାକିବା ଜଗତ ସାଇଁ

ସାରା ଜଗତ ତ  ଚାହିଁ ବସିଅଛି

     ବରଷକ ଦାନା ପାଇଁ l

ଶୁଭ ଆଶୀର୍ବାଦ  ଦେବ ପ୍ରଭୁପାଦ

     ଶୁଭ ହେବ ଏହି ବର୍ଷ

ଶସ୍ୟ ଶ୍ୟାମଳା  ଭରି ଯିବ ଏଠି

     ପାଇ ତାଙ୍କରି ପରଶ l