ସିଂହନାଥରେ ସାନ୍ଧ୍ୟ ଭ୍ରମଣ
ସିଂହନାଥରେ ସାନ୍ଧ୍ୟ ଭ୍ରମଣ
ବେଳ ରତରତ ହେଉଛି ମାଆ କୋଳକୁ ରବି
ଡେଇଁ ପଡ଼ିବାକୁ ଉଦ୍ୟତ ସାଜି ଲୋହିତ ଛବି |
ସିଂହାଚଳ ଚୂଳ ବରଜି ଭାନୁ ମଣିଭଦ୍ରାର
ଶିଖରେ ସ୍ୱକରେ ବୁଣିଲେ ଅସ୍ତରାଗ-ମନ୍ଦାର |
ମହାନଦୀ ନୀଳ ସଲୀଳେ ହୋଇ ପ୍ରତିଫଳିତ
ପ୍ରବଳ ପ୍ରବାଳ ବରଣ ଛବି କରେ ମୋହିତ |
ମୃଦୁଳ ହିଲ୍ଲୋଳ ଲୋଳଇ ସାୟନ୍ତନ ବେଳରେ
ନାବିକ କଣ୍ଠରୁ ଆହୁଲା ତାଳେ ସଂଗୀତ ଝରେ |
ନୀଡ଼ ଅଭିମୁଖେ ଫେରନ୍ତି ପକ୍ଷୀ କରି କୂଜନ
ନିଶିମୁଖ ଆଗମନୀର ବାର୍ତ୍ତା କରି ବଣ୍ଟନ |
ମହାନଦୀ ସେତୁ ଉପରେ କରୁ ସାନ୍ଧ୍ୟ ଭ୍ରମଣ
ମୁକ୍ତ ସମୀରଣ ସେବନ ସଙ୍ଗେ ମନୋରଞ୍ଜନ |
ସ୍ୱର୍ଣ୍ଣିମ ବାଲୁକା ଶ୍ୟାମଳ ପଠା ସୁଷମା ଶିରୀ
ଭାବାନ୍ତର ଆଣେ ମନରେ ନଭ ଚୁମ୍ବିତ ଗିରି |
ଶମ୍ଭୁ ଆଳୟରୁ ଶୁଭିଲା କମ୍ବୁ ମଙ୍ଗଳ ସ୍ୱର
ରଙ୍ଗେ ବେଳାକୁଳା ଚୁମ୍ବିଲା ନୀଳ ଜଳ ଲହର |
ଦେବ ସିଂହନାଥ ପୀଠସ୍ଥ ମହୀରୁହ ସକଳ
ମୃଦୁ ପ୍ରଭଞ୍ଜନ ପରଶେ ସନ ସନ ଚଞ୍ଚଳ |
ଧିରେ ଧିରେ କଳା ପରଦା ଢାଙ୍କେ ସନ୍ଧ୍ୟା ସୁନ୍ଦରୀ
ଜଳ ସ୍ଥଳ ନଭ କାନନ ଜନପଦ ବିସ୍ତରି |
ବାଙ୍କୀ ଚର୍ଚ୍ଚିକାୟୀ ଦେଉଳ ଚୂଳେ ବିଜୁଳିବତୀ
ପ୍ରାଚୀ ଦିଗାଙ୍ଗନମଣ୍ଡିଲା କାବ୍ୟତାରା ଝଟତି |
ପ୍ରତୀଚି ଦିଗନ୍ତେ ଶ୍ରୀବାଣେଶ୍ୱର ନୀଳମାଧବ
ପାହାଡ଼ ସୂଚାଏ ପୁରାଣ ଇତିହାସ ବିଭବ |
ଉତ୍ତରେ ରଗଡିପଡ଼ାର ରଘୁନାଥ ମନ୍ଦିର
ଯାମ୍ୟେ ରାମନାଥ ବୈଦେହୀନାଥ ରାଜେ ରୁଚିର |
ଫୁଟିଗଲେ ନଭେ ଗୋଟିକି ଗୋଟି ତାରକା ପନ୍ତି
ବିହରିଲେ ନିଶା ସଙ୍ଗରେ ରଙ୍ଗେ ରଜନୀପତି |
ସାନ୍ଧ୍ୟ ଭ୍ରମଣାନ୍ତେ ଫେରିଲି ଅତି ହୃଷ୍ଟ ମନର
ଅନୁଭବ ଏତ ଶାଶ୍ୱତ ସତ୍ୟ ଭାବ ରାଜ୍ୟର |
ଶରୀର ସହିତ ମନର ହେଲା ପୂର୍ତ୍ତି ସାଧନ
ଯୋଗୀଜନ ମନ ବାଞ୍ଛିତ ଏତ ପରମ ଧନ |