ମୁଁ ନୁହେଁ ମୁଁ
ମୁଁ ନୁହେଁ ମୁଁ
ମୁଁ ନୁହେଁ ମୁଁ ସତରେ କିଏ ମୁଁ
ଖୋଜିବାକୁ ବାହାରିଲି
ଯେତିକି ଯେତିକି ଖୋଜି ମୁଁ ବୁଲିଲି
ସେତିକି ଆଶ୍ଚର୍ଯ୍ୟ ହେଲି ।
ପଞ୍ଚମହାଭୂତ କ୍ଷିତି ଆପ ତେଜ
ବ୍ୟୋମ ମରୁତକୁ ନେଇ
ଶରୀର ମୋହର ଗଢା ହୋଇଅଛି
ତା ଭିତରେ ଅଛି ମୁହିଁ ।
ମୁଁ ନୁହେଁ ମୁଁ କାହିଁକି କହୁଛି
ମୁଁ କହେ ମୋ ଶରୀର
ମୁଁ ନୁହେଁ ଶରୀର ଶରୀର ଭିତରେ
ରହିଛି ମୁଁ ମୋହର ।
ହାତ ଗୋଡ ଦେହ କିଛି ନୁହେଁ ମୁଁ
ନୁହେଁ ଆଖି ନାକ କାନ
ମୁଁ ନୁହେଁ ମୁଁ ଶରୀର ଭିତରେ
ରହିଛି ମୋର ଜୀବନ ।
ମୋତେ ମୁଁ କେବେ ଦେଖି ପାରେ ନାହିଁ
ଦେଖେ ମୋ ଅଙ୍ଗପ୍ରତ୍ୟଙ୍ଗ
ମୋତେ ମୁଁ ମୋ ଭିତରେ ଦେଖିବି
କରିଲେ ସାଧନ ଯୋଗ ।
ମୁଁ ମୁଁ ବୋଲି ଯାହା ମୁଁ କହୁଛି
ମୁଁ ନୁହେଁ ସେଇ ମୁଁ
ମୋ ଭିତର ମୁଁ ଦେଖିନାହିଁ କେହି
କେବେ ବି ଦେଖିନି ମୁଁ ।
ଗୀତା ଭାଗବତ ପୁରାଣ ବେଦାନ୍ତେ
ଲେଖା ଅଛି ଯାହା ମୁଁ
ଅଙ୍ଗୁଷ୍ଠ ପ୍ରମାଣ ଶରୀରେ ରହିଛି
ଜ୍ୟୋତି ସ୍ବରୂପରେ ମୁଁ ।
ଶରୀର ମୁଁ ନୁହେଁ ମୁଁ ମୋହର ଆତ୍ମା
ଜନ୍ମ ମୃତ୍ୟୁ ନାହିଁ ତାର
ଶସ୍ତ୍ର ନ କାଟଇ ଅଗ୍ନି ନ ଦହଇ
ନ ଶୋଷେ ତାକୁ ସମୀର ।
ନ ବୁଡଇ ଜଳେ ରହିଛି ନିଶ୍ଚଳେ
ଜରା ବ୍ୟାଧି ତାର ନାହିଁ
ନିତ୍ୟ ସର୍ବଗତ ସ୍ଥାଣୁ ସ୍ୱରୂପରେ
ସଦା ସର୍ବଦା ରହଇ ।
ନିଶ୍ଚିନ୍ତରେ ମୁଁ ସଦା ରହିଅଛି
ଯେଣୁ ମୁଁ ନୁହେଁ ମୁଁ
ଦିନେ ନା ଦିନେ ମୁଁ ଫେରିବି ସେଠିକି
ଯେଉଁଠୁ ଆସିଛି ମୁଁ ।