ଚଷମା
ଚଷମା
ବଇଠକ ଘରେ ବିନା ଚଷମାରେ
ପଢ଼ନ୍ତି ଜେଜେ ଖବର କାଗଜ
ଚଷମା ନପିନ୍ଧି କିପରି ପଢ଼ୁଛ
କୁନା କହେ ମୋତେ କୁହ ହେ ଜେଜ ।
ପାକୁଆ ପାଟିରେ ପାନକୁ ଚୋବାଇ
ଜେଜେ ଗେହ୍ଲେଇ କହନ୍ତି କୁନାକୁ
ଜଳଜଳ କରି ଅକ୍ଷରଗୁଡାକ
ଦିଶୁଅଛି ପରା ମୋର ଆଖିକୁ ।
ଆଖିର ଯତ୍ନ ମୁଁ ନିଏ ସବୁବେଳେ
କରଇ ନିତି ପୌଷ୍ଟିକ ଆହାର
ଭିଟାମିନ-'ଏ' ଖାଦ୍ୟ ଭଲପାଏ
ସଜନା ଶାଗ ଅତି ପ୍ରିୟ ମୋର ।
ବାହାରକୁ ଗଲେ ଧୂଳି ଧୂଆଁ ପାଇଁ
ଚଷମା ସିନା ସୁରକ୍ଷା କବଚ
ମାତ୍ର ଲୋଡ଼ା କେବେ ପଡେ ନାହିଁ ମୋତେ
ପଢ଼ିବା ପାଇଁ ସେ ଚଷମାକାଚ ।
ଏବର ଯୁଗରେ ଚଷମା ଆଦର
ଆବାଳବୃଦ୍ଧବନିତା ପାଖରେ
ଏକ ଅଙ୍ଗ ପରି ରହିଛି ଯେମିତି
ତାହା ପରା ପ୍ରତିଟି ଜୀବନରେ ।
ଆଖିର ସମସ୍ଯା ସମାଧାନ ପାଇଁ
ନିଜ ଦୃଷ୍ଟିଶକ୍ତି ପ୍ରକାର ଭେଦେ
ସରବେ ପିନ୍ଧନ୍ତି ଗଢ଼ାଇ ଚଷମା
ମନ ପରା ଆଶ୍ବାସନରେ ଭେଦେ ।
ଅବତଳ ଆଉ ଉତ୍ତଳ କାଚରେ
ଗଢ଼ା ହୁଅଇ ଚଷମା ଶରୀର
ଡାକ୍ତରଙ୍କ ପରାମର୍ଶ ଅନୁସାରେ
ହୋଇଥାଏ ଏହାର ବ୍ୟବହାର ।
ପିଲାଙ୍କ ମନକୁ ଆକୃଷ୍ଟ କରଇ
ରଙ୍ଗବେରଙ୍ଗର ଚଷମାଟିଏ
ସେଥିପାଇଁ ପରା ତୋ ମନ ପସନ୍ଦ
ସାଇତି ରଖିଛୁ କେତେଗୁଡି଼ଏ ।
ଯୁବକଯୁବତୀ ଆଦର କରନ୍ତି
କଳା ଚଷମାକୁ ଖରା ଦିନରେ
ବୟସ୍କ ବ୍ୟକ୍ତିଟି ଲଗାଏ ଏହାକୁ
ଆଖି ଅସ୍ତ୍ରୋପଚାର ହେବା ପରେ ।
ଆଖି ପାଇଁ ପରା ଦୁନିଆ ଦେଖନ୍ତି
ତା' ବିନା ସବୁ ଅନ୍ଧକାରମୟ
ନିଜ ପାଇଁ ରତ୍ନ ଭାବି ତାକୁ ଯତ୍ନ
ନେଉଥିଲେ ଜୀବନ ସୁଖମୟ ।
ମନେ ରଖିବୁ ତୁ ଚଷମା ମହତ୍ତ୍ଵ
ଆଜି କହିଲି ଯା' ତୋତେ ବୁଝାଇ
ଆଖିରେ ସମସ୍ୟା କେବେ ହେବ ନାହିଁ
ମୋ' ପରି ବୁଢ଼ା ହେଲେ ବି ତୁହି ।