ଦାଉ ସାଧୁଛି ବନ୍ୟା
ଦାଉ ସାଧୁଛି ବନ୍ୟା
ଶ୍ରାବଣ ଭାଦ୍ରବ ବେଉଷଣ ବେଳ
ଦାଉ ସାଧିଲାଣି ବନ୍ୟା
କ୍ଷେତରେ ଭାଙ୍ଗୁଛି ସମୁଦ୍ର ଲହଡ଼ି
ମନ ମାନୁ ନାହିଁ ଜମା ।
ଚାହିଁଛି କୃଷକ ଚାହିଁଛି ଶ୍ରମିକ
ପରିଶ୍ରମ ହେଲା ବୃଥା
କେମିତି ଚଳିବ ବରଷକ ଯାକ
ଭାବି ମନେ ଆସେ ବ୍ୟଥା ।
ଘର ଚାରିପଟେ ଜଳର୍ଣ୍ଣବ ଘଟେ
ରାସ୍ତା ଘାଟେ ପାଣି ସୁଅ
ହୀରାକୁଦ କୁହେ ବିନ୍ଧୁଛି ମୋ ଦେହ
ଛାନିଆଁ କାହିଁକି ହୁଅ ।
ନୋହିଲେ ଭାଙ୍ଗିବ ବନ୍ଧ ବାଡ ମୋର
ଓଡ଼ିଶା ତ ଜୀବ ବୁଡି
ତଳ ମାଳିଆ ଯେ ମୋ ଭାଇ କୁଟୁମ୍ବ
କେ ବେଳେ ମୋର ଭଗାରି ।
ଊଛୁଳା ନଦୀରେ କେତେ ବନ୍ଧ ଭାଙ୍ଗେ
ଭାସି ଯାଏ ଘର ଦ୍ବାର
ଖୋଲା ଆକାଶରେ ଆଶ୍ରୟ ସ୍ଥଳରେ
ଜନେ ହୋନ୍ତି କଲବଲ ।
ଲଘୁଚାପ ବର୍ଷା ତୁହାକୁ ତୁହା ଯେ
ପୁଣି ହୋଇଲା ଭଗାରି
ମଶା ଡାଆଁସରେ ଭୋକ ଉପାସରେ
କେତେ ଆଉ ଧୈର୍ଯ୍ୟ ଧରି ।
ଆଠ ଦିନ ପୁଣି ପାଣି ବୁଡ଼ିଲାଣି
ଡ଼୍ୟାମରୁ ପାଣି ସରୁନି
ଛତିଶ ଗଡରେ ପୁଣି ବର୍ଷା ହେବ
ସତର୍କ ବାର୍ତ୍ତା ଦେଲେଣି ।
ବରଷା ହୋଇବ ଛତିଶ ଗଡ଼ରେ
ଭୋଗିବେ ଓଡ଼ିଶା ବାସି
ସରକାରଙ୍କର ଅପାରଗ ପଣ
ଜାଣିଲେଣି ଦେଶ ବାସି ।
କିଏ ସେ ହସୁଛି କିଏ ଯେ କାନ୍ଦୁଛି
କିଏ କେତେ ମିଛ ସତେ
ରାଜ କୋଷ ଖାଲି ଆତ୍ମସାତ କରି
ବାହାବା ମାରନ୍ତି କେତେ ।
ପନ୍ଦର ଦିନର ଦେବେ ସରକାର
ସାହାଯ୍ୟ କ୍ଷତିଗ୍ରସ୍ତଙ୍କୁ
ବରଷକ ପୁଣି କେମିତି ଚଳିବ
କିଏ ଦେବ ଆଣି ତାଙ୍କୁ ।
ଦେଖେ ଜଳ ଜଳ ଶ୍ରମିକ କୃଷକ
ହାତ ମାଛ ଚିଲ ନିଏ
କେମିତି ଚଳିବ କେମିତି ରହିବ
ଭାବି ଭାବି ଦିନ ଯାଏ ।