ମାଟିର ମହକ
ମାଟିର ମହକ
ଆକାଶ ତୋ' ପିତା ମାଟି ତୋର ମାଆ
ମନେ ରଖିଥିବୁ ତୁହି,
ପିତା ମାତା ପରା ଚଳନ୍ତି ପ୍ରତିମା
ଏକଥା ଭୁଲିବୁ ନାହିଁ ।
କହିବାକୁ ସତ ହେବୁନି କୁଣ୍ଠିତ
ଜମାରୁ ଡରିବୁ ନାହିଁ,
ମିଥ୍ୟା ଆଗେ ତୁହି ମୁଣ୍ଡ ନ ନୁଆଇଁ
ଚାଲ ସ୍ୱଚ୍ଛ ମନ ନେଇ ।
ବଡ଼ଙ୍କୁ ସମ୍ମାନ ଛୋଟ' ସ୍ନେହ ଦାନେ
ସଙ୍କୋଚ କରିବୁ ନାହିଁ,
ମନତଳ କଥା ବୁକୁ ତଳ ବ୍ୟଥା
ଖୋଲି କହିବୁରେ ତୁହି ।
ପାଳି ଶାଳୀନତା ରଖିବୁ ମର୍ଯ୍ୟାଦା
ପିନ୍ଧିବୁ ତନୁ ଘୋଡ଼ାଇ,
ଭୁଲ୍ ରାସ୍ତାରେ ଯେ ସାଙ୍ଗ ସାଥି ମେଳେ
ଯିବୁ ନାହିଁ ଧନ ତୁହି ।
ସଅଳ ଶୋଇବୁ ସଅଳ ଉଠିବୁ
ପ୍ରାତଃ ସ୍ନାନ କର ତୁହି,
ପିଜ୍ଜା ଓ ବର୍ଗର ମ୍ୟାଗି ଚାଓମିନ
ଦେହ ପାଇଁ ଭଲ ନାହିଁ ।
ମାୟାର ସଂସାର ମିଥ୍ୟା ଛଳନାର
ରୁହ ସାବଧାନ ହୋଇ,
ସବୁକଥା ଧନ କହ ଖୋଲି ମନ
ଯେବେ ଅନ୍ତେବାସୀ ଥାଇ ।
ହାତେ ମାପି ତହିଁ ଚା'ଖଣ୍ଡେ ଚାଲିବୁ
ମାନବିକତାକୁ ନେଇ,
ଉତ୍ତମ ଚରିତ୍ର ଗଠନ କରିବୁ
ପ୍ରଭୁଙ୍କର ନାମ ଧ୍ୟାୟୀ ।
ସୁରା ପାନ ନିଶା ପାଶ୍ଚାତ୍ୟର ଦ୍ରବ୍ୟ
କେବେ ତୁ ଛୁଇଁବୁ ନାଇଁ,
ତୋର ଜୀବନର ତୁ ନିଜେ ନିର୍ମାତା
ଏକଥା ଭୁଲିବୁ ନାହିଁ ।
ନିଜ 'ପରେ ଦୃଢ଼ ବିଶ୍ୱାସ ରଖିବୁ
ତୋ'କର୍ମ ଭୁଲିବୁ ନାହିଁ,
ମାଆ ବାପା ତୋର ଦେବେ ସମର୍ଥନ
ଆଶୀର୍ବାଦ ଥିବ ରହି ।
ମାଆ ବାପା ଭଳି ବନ୍ଧୁ ଟିଏ କାହିଁ
ଜଗତେ ପାଇବୁ ନାହିଁ,
ଝଡ଼ ଝଞ୍ଜା ଯେତେ ଆସୁ ପଛେ ପ୍ରାଣେ
ଧୈର୍ଯ୍ୟ ହରାଇବୁ ନାହିଁ ।
ଯେଉଁଠି ତୁ ଯାଆ ଭଲରେ ତୁ ଥାଆ
ଚିନ୍ତା ତୁ କରିବୁ ନାହିଁ,
ବିଭୁ ପାଦେ ତୋତେ କଲି ସମର୍ପଣ
ଇଚ୍ଛା ପୂର୍ଣ୍ଣ କର ସାଇଁ ।