ଦୋଳରେ ତୁ ଦୋଳ ଗୋବିନ୍ଦ
ଦୋଳରେ ତୁ ଦୋଳ ଗୋବିନ୍ଦ
ଦୋଳେ ତୁ ଗୋବିନ୍ଦ ମୁରାରୀ ମୁକୁନ୍ଦ
ରାଧା ଶ୍ୟାମ ମୂର୍ତ୍ତି ଯୁଗଳ,
ବେଣୁ ଧରି ହସ୍ତେ ଶ୍ରୀରାଧା ସଙ୍ଗତେ
ବେନି ରଚନ୍ତି ରାସ ଖେଳ ।
ନନ୍ଦ ଗୋପାଳ....
କହ୍ନେଇ ମାରେ ଫୁଲଶର
ରାଧାର ଓଢ଼ଣୀ ଦିଏ ଧୀରେ ଟାଣି
ନଟଖଟ ନଟନାଗର ।।୧।।
ରାଈ ଦାମୋଦର ଆହାଃ କି ସୁନ୍ଦର
ଗୋପୀ ଗୋପାଙ୍ଗନା ସାଥିରେ ,
ଝୁଲଣରେ ବସି ମନ୍ଦ ମନ୍ଦ ହସି
ରଙ୍ଗେ ତା'ର ଶ୍ୟାମ ସଙ୍ଗରେ ।
ଗୋପଦାଣ୍ଡରେ....
ରାଧା ବସି କାହ୍ନୁ କୋଳରେ
କଜ୍ଜ୍ବଳ ନୟନେ ସଲଜ ଆନନେ
ରାସେଶ୍ୱରୀ ଚାହେଁ ପ୍ରୀତିରେ ।।୨।।
ଶଙ୍ଖ ହୁଳହୁଳି ପଡୁଛି ଉଛୁଳି
ସଭିଏଁ ରଙ୍ଗେ ବିଭୋର,
ଫଗୁଣର ରଙ୍ଗେ ଜାଗେ ଅଙ୍ଗେ ଅଙ୍ଗେ
ପ୍ରଗାଢ଼ ଭାବ ପ୍ରଣୟର ।
ଶ୍ୟାମ ସୁନ୍ଦର...
ହେ କୃଷ୍ଣ ରାସ ରାସେଶ୍ୱର ,
ଦୋଳ ପୂର୍ଣ୍ଣିମାରେ ପୂର୍ଣ୍ଣମାସୀ ରଚେ
ଫଗୁଣେ ଫଗୁରେ ବିଭୋର ।।୩।।
ରାଧା କାନଫୁଲ ଘେନି ଗଲା ଚିଲ
ଯମୁନାରେ ସ୍ନାନ ସମୟେ ,
କୃଷ୍ଣ ସୁଦାମାଙ୍କୁ ମିଳିଲା ଭାଗ୍ୟକୁ
କୁଞ୍ଜବନେ ଖେଳ ସମୟେ ।
ରାଧାମୋହନ...
ସ୍ୱର୍ଣ୍ଣ ପାଲିଙ୍କିରେ ଗମନ
"ସ୍ୱର୍ଣ୍ଣତାଟକ"ଟି ଗ୍ରହଣ କରନ୍ତି
ବୃଷଭାନୁ ସୁତା କାଞ୍ଚନ ।।୪।।
ଯଶୋମତୀ ବାଳ ଦେବକୀ ଦୁଲାଳ
ନନ୍ଦର ଗୋପାଳ କେଶବ ।
ହୋଲିକା ରାକ୍ଷସୀ ତୁମେ ଥିଲ ନାଶି
ଦୋଳ ପର୍ବେ ଆସି ମାଧବ,
ରାଧାବଲ୍ଲଭ...
ହେ ରାଧା କୃଷ୍ଣ ଶ୍ରୀ ବଲ୍ଲଭ ,
ରାଈଦାମୋଦର ଦର୍ଶନରେ ଲାଭ
ହୁଏ ମୋକ୍ଷ ଯାହା ଦୁର୍ଲଭ ।। ୫।।