ଶୁଭ ଦୀପାବଳି
ଶୁଭ ଦୀପାବଳି
ଉତ୍କଳ ବିଭବ ପରମ୍ପରା ବିତ୍ତ
ସଂସ୍କୃତିର ଗନ୍ତାଘର ,
ବାରମାସେ ତେର ଉତ୍ସବ ପରବ
ଉତ୍କଳୀୟ ଚେତନାର ॥
ପୂର୍ବସୁରୀ ଗାଥା ପରଲୋକେ ସତ୍ତା
ଦୀପାବଳି ପୁଣ୍ୟ ପର୍ବ ,
ଆଲୋକ ସଂହିତା ପାଳନେ ସଦିଚ୍ଛା
ମହନୀୟତା'ର ଭାବ ॥
ହେ' ପିତୃ ପୁରୁଷ ସ୍ୱର୍ଗବାସୀଲୋକ
ତୂମ୍ଭରି ଦାୟାଦ ଆମ୍ଭେ ,
ସ୍ୱର୍ଗପୁରେ ଥାଇ ଦିଅ ଶୁଭ ଦୃଷ୍ଟି
କୁଶଳେ ରହିବୁ ସର୍ବେ ॥
ଶୁଭ ଲଗନରେ ପ୍ରୀତି ପରଶରେ
ଆସହେ ବଡ଼ ବଡୁଆ ,
ତଵପ୍ରତୀକ୍ଷାରେ ଆଶା ଆକାଂକ୍ଷାରେ
ଜାଳୁଛୁ ଅନ୍ଧାରେ ନିଆଁ ! !
ଅମା ଅନ୍ଧକାର ପ୍ରୀତି ସୌହାର୍ଦ୍ଦ୍ୟର
ହସ୍ତେ ବନ୍ଦାପନା ଥାଳି ,
ସରଗପୁର'ରୁ ଆସିବକି ଗୁରୁ
ନିଇତି ହେଉଛୁ ଭାଳି ! !
ଆଲୋକ ପ୍ରଦୀପ ସୌଭାଗ୍ୟ ବିଜୟ
ସମୃଦ୍ଧିର ଭବ୍ୟଛବି ,
ଏଇ ଭାରତରେ ଦିବ୍ୟ ଚେତନାରେ
ମହା ଅନୁଭବେ କବି ! !
ଶୁଭ ଦୀପାବଳି ସଂସ୍କୃତି ବିଭବି
ସଭିଁଙ୍କ ହୃଦୟ ଛୁଁଏ ,
ବରଷକେ ଥରେ ଆସେ ସରାଗରେ
ପୂର୍ବଜ ଗାଥାକୁ ଗାଏ ! !
ପରମ୍ପରାଗତ ପରବ ଏ'ସତ
ପୂର୍ବଜ ସ୍ମୃତିର ପ୍ରୀତି ,
ବଡ଼ ବଡୁଆଙ୍କ ମର୍ତ୍ତ୍ୟ ଆଗମନେ
ଜଳି ଉଠେ ଅର୍ଘ୍ୟବତୀ ! !
ପୁରାଣ ବର୍ଣ୍ଣିତ କାହାଣୀ ପ୍ରତୀତ
ସ୍ଵର୍ଗାଲୋକେ ପୂଜ୍ୟାସ୍ପଦ ,
କୁହୁକର ପେଡ଼ି ଖୋଲିଛି ଭାରତୀ
ପ୍ରଥା ପରମ୍ପରା ସିଦ୍ଧ ! !
ପିଷ୍ଟକ ମିଷ୍ଟକ ଦୀପାବଳି ମିତ
କୁଳବଧୂ ପରାକାଷ୍ଠା ,
ସ୍ଵହସ୍ତେ ଗଢଇ କାକରା ଆରିଶା
ତ୍ୟାଗପୂତ ତା'ର ନିଷ୍ଠା ! !
ପୂଜିବ ପ୍ରୀତିରେ କୁଳବଧୂ ସତେ
ଭକତି ପସରା ମେଲି ,
ସୁକଲ୍ୟାଣ କର ପୂର୍ବଜ ପୁରୁଷ
ପାରିବନି ସେ'ଯେ ଭୁଲି ! !
ଶୁଭ ଆଶିର୍ବାଦ ଦିଅ ଦିବଂଗତ
ଆମ୍ଭେ ତଵ ଅଂଶୀଦାର ,
ସୌଭାଗ୍ୟ ବିଜୟ ହୋଇଲେ ଆମ୍ଭର
ଝରିବ ଅମୃତ ନୀର ! !
ମହା ଆଲୋକରେ ଆସିବ ଭାସ୍କରେ
ଦୀପାବଳି ଖ୍ୟାତି ପାଇଁ ,
ଝୋଟିଚିତା ଆଙ୍କି ରହିଚି ମୁଁ'ଚାହିଁ
ଉପବାସେ କୁଳସାଇଁ ! !
ମାଆ ମହାକାଳୀ ସୁଖ ଦିଅ ଢାଳି
ତୁମ୍ଭରି ଆଶ୍ରିତ ଆମ୍ଭେ ,
ଏମର୍ତ୍ତ୍ୟ ପୁରରେ ତଵ ନାମ ଭାସେ
ଭରସାରେ ଅଛୁ ଅମ୍ବେ ! !
ଆଲୋକର ପର୍ବ କରିବ ଦହନ
ଗର୍ବ ଅହଂକାର ହିଂସା ,
ସଂପର୍କର ଭାବ ହେବତ ବଳିଷ୍ଠ
ଦୁରୀଭୂତ ହେବ ଈର୍ଷା ! !
ହେ'ବଡ଼ ବଡୁଆ ସ୍ମୃତିର ଦୁନିଆଁ
ଜଗତର ସ୍ନେହିଁ ବନ୍ଧୁ ,
କର ପୁଷ୍ପବୃଷ୍ଟି ସରଗୁ ନିକ୍ଷେପି
ତୁମ୍ଭେ ପରା କୃପାସିନ୍ଧୁ ! !
ସ୍ଵର୍ଗାବତରଣ କର ଶାନ୍ତି ଦୂତ
ଦୀପାବଳି ମହୋତ୍ସବେ ,
ବଡ଼ ବଡୁଆର ସାର୍ଥକତା ରଖ
ତଵ ପାଦ ପଡୁ ଭବେ ! !
ଶୁଭ ଆଶୀର୍ବାଦ କରିବ ନିଶ୍ଚୟ
ସ୍ଵର୍ଗବାସୀ ପୂର୍ବସୁରୀ ,
ତଵ ସୁକଲ୍ଯାଣେ ରହିବୁ କୁଶଳେ
ହରିନାମ ତୁଣ୍ଡେ ଧରି ॥