ଶତ୍ରୁ
ଶତ୍ରୁ
ଜୀବନରେ ଯଦି ଶତ୍ରୁ କା'ର ଥାଏ
ତା ଜୀବନ ଧନ୍ୟ ହୁଏ
ଶତ୍ରୁତା ପାଇଁ ତ ଏଇତ ମଣିଷ
ଊର୍ଦ୍ଧ୍ବଗାମୀ କରି ଥାଏ ।
ଶତ୍ରୁ ତ ନ ଥିଲେ ଜୀବନ ସଂଘର୍ଷ
ଫିକା ଫିକା ଲାଗି ଯାଏ
ସେଇ ଶତ୍ରୁ ପାଇଁ ଏଇତ ମଣିଷ
ବୁଦ୍ଧି ଜ୍ଞାନ ଶିକ୍ଷା ପାଏ ।
ଶତ୍ରୁ ଯୋଗୁଁ ସିଏ ଭଲ ମନ୍ଦ କ'ଣ
ପରଖି ଯେ ପାରି ଥାଏ
ଏଇ ଶତ୍ରୁ ଯୋଗୁଁ ତା ଅନ୍ଧ ପୁଟୁଳି
ଆଖିରୁ ତା ଖୋଲି ଯାଏ ।
ଛଳନା କପଟ ହିଂସା ଅହଂକାର
ଅନ୍ୟାୟ ଅଧର୍ମ ଗୁଣ
ସ୍ୱାର୍ଥ ଗର୍ବ ଲୋଭ ମିଛ ମୋହ ମାୟା
ଅପମାନ ସନମାନ ।
ଶତ୍ରୁର ପାଖରୁ ଏଇ ସବୁ ଗୁଣ
ଭଲ ଭାବେ ଜଣା ଯାଏ
ସେଥିପାଇଁ ଶତ୍ରୁ ଜୀବନ ପଥର
ମାନଦଣ୍ଡ ସାଜି ଥାଏ ।
ନାଆର ଯେ ଶତ୍ରୁ ଢେଉ ସାଜି ଥାଏ
ତଥାପି ସେ ଲୋଡା ହୁଏ
ତାହାରି ଢେଉରେ ମାଡ ଖାଇ ନାଆ
କୂଳରେ ପହଞ୍ଚି ଥାଏ ।
କୂଟ ଚକ୍ରାନ୍ତରେ ଶତ୍ରୁ ଚାଲୁ ଥାଏ
ଛଳନା ଜାଲ ବିଛାଇ
ତା ପାଇଁ ମଣିଷ ଚାଲାକି ହେଇଣ
ବଞ୍ଚିବା ରାସ୍ତା ଶିଖଇ ।
ଦୁର୍ଯ୍ୟୋଧନ ପାଣ୍ଡବଙ୍କ ଶତ୍ରୁ ସାଜି
ଯଉଘରେ ରଖି ଦେଲେ
କୌଶଳେ ସୁଡଙ୍ଗ ତିଆରି କରି ସେ
ଅଗ୍ନିରୁ ବାହାରି ଗଲେ ।
ଶତ୍ରୁ ଯୋଗୁଁ ସିନା ଏଇତ ମାନବ
ଅନେକ ଶିକ୍ଷା ଯେ ପାଏ
ନିଜ ବୁଦ୍ଧି ଖଟାଇଣ କର୍ମ କରି
ନିଜେ ପ୍ରତିଷ୍ଠିତ ହୁଏ ।
ସହି ହୁଏ ନାହିଁ ଶତ୍ରୁର ଯାତନା
ଶତ୍ରୁର ସେ ଅପମାନ
ସେଇ ଅପମାନ ଖୋଲି ଦେଇଥାଏ
ହୃଦୟ ଦ୍ୱାରର ଟାଣ ।
ତାହା ପାଇଁ ସିଏ ମନେ ଜିଦି ରଖି
ଲକ୍ଷ୍ୟ ମଜବୁତ୍ କରେ
ଦିନେ ନା ଦିନେ ସେ ସେଇ ଶତ୍ରୁ ପୁଣି
ତାହାରି ପାଖରେ ହାରେ ।
ଅଭିମାନୀ ଦୁର୍ଯ୍ୟୋଧନ ଏକଲବ୍ୟେ
ଅପମାନ ଦେଲା ଘୋର
ଗୁରୁ ଦ୍ରୋଣାଚାର୍ଯ୍ୟ ଶିଷ୍ୟତ୍ବରୁ ତାଙ୍କୁ
କରି ଦେଲା ସେ ବାହାର ।
ଉପହାସ ସହି ନ ପାରିଣ ସିଏ
ମନୋବଳ ଦୃଢ କଲେ
ଦୁର୍ଯ୍ୟୋଧନ ଶତ୍ରୁ ଭାବ ପାଇଁ ସିଏ
ଯୁଦ୍ଧରେ ନିପୁଣ ହେଲେ ।
ନିଜ ବାହୁ ବଳେ କର୍ତ୍ତବ୍ୟ ଉପରେ
ଦୃଢତା ଯାର ରହିଛି
ଯେତେ ଶତ୍ରୁ ତା ଜୀବନେ ଆସିବେ ତା
ଜୀବନ ସାର୍ଥକ ଅଛି ।
ଶତ୍ରୁ ଯେତେ ଥିବେ ଜୀବନେ ଯାହାର
ତା ଭାଗ୍ୟ ଉଜ୍ଜଳ ହେବ
ସେଇ ଶତ୍ରୁ ପାଇଁ ଏଇତ ମଣିଷ
ଶୀର୍ଷ ସ୍ଥାନ ଛୁଇଁ ଯିବ ।
ଶତ୍ରୁ ହିଁ କରଇ ଚାଲାକି ଚତୁର
ତା ପାଇଁ ବଞ୍ଚିବା ଶିଖେ
ନିଜର ସମ୍ମାନ ନିଜେ ରକ୍ଷା କରି
ନିଜ କର୍ମ ନିଜେ ଲେଖେ ।
ଇତିହାସ କଥା ମନେ ପଡିଯାଏ
ଛତ୍ରପତି ଯେ ଶିବାଜୀ
ଆଫଜଲ ଖାଁ ଶତ୍ରୁ ଭାବ ଜାଣି
ଛଳନେ ନ ଥିଲେ ହଜି ।
ଜାଣିଥିଲେ ଶତ୍ରୁ ମିତ୍ରତା ହେବନି
ନିଜେ ପ୍ରସ୍ତୁତ ହୋଇଲେ
ଆଫଜଲ ଖାଁ ମାରିବା ସମୟେ
ବାଘ ନଖେ ଚିରି ଦେଲେ ।
ଶତ ଧନ୍ୟବାଦ ଶତ୍ରୁକୁ ଯେ ଦିଅ
ସିଏ ଆମ ଭଗବାନ
ତାର ପାଇଁ ଆଜି ଅଭିମାନ ରଖି
ରହିଛି ଆମରି ଟାଣ ।
ଶତ୍ରୁର ପାଖରୁ ଆମକୁ ଅନେକ
ଶିକ୍ଷା ଯେ ମିଳି ପାରୁଛି
ତାହା ପାଇଁ ଆଜି ଏ ଆମ ଜୀବନ
ମାର୍ଜିତ ହେଇ ଚାଲିଛି ।
ଯା' ଜୀବନେ ଶତ୍ରୁମାନେ ରହିଥାନ୍ତି
ତା ଜୀବନ ଧନ୍ୟ ହୁଏ
ସେଇ ଶତ୍ରୁ ପାଇଁ ତାହାର ସେ ଭାଗ୍ୟ
କ୍ଷଣିକେ ବଦଳି ଯାଏ ।
ସିଏ ଜାଣେ ସିନା ଶତ୍ରୁ ସେ ଆମର
ମନେ ରାଗ ରଖି ଥାଏ
ହେଲେ ଆମ ପାଇଁ ସାଜି ଥାଏ ସିଏ
ଉପକାରୀ ବନ୍ଧୁଟିଏ ।
ଦୁନିଆ ଆଖିରେ ସାଜେ ଶତ୍ରୁ ସିଏ
ଆମ ପାଇଁ ସେ ଠାକୁର
ସେଇ ଶତ୍ରୁ ମିତ୍ର କାମ କରୁଅଛି
ତା ପାଦେ କୋଟି ଜୁହାର ।