Library
ଶ୍ରମିକର ପରିଚୟ
ଶ୍ରମିକର ପରିଚୟ
ଶ୍ରମିକ ମୋ ପରିଚୟ
କରେନା ମୁଁ ଅନ୍ତର
ଲହୁ ଲୁହ ଢାଳିଦିଏ
ସେବା ମୋର ଈଶ୍ୱର ।
ଉଚ୍ଚ କାମ ନୀଚ କାମ
ସବୁ କରେ ନିଜର
ସମର୍ପିତ ପ୍ରାଣ ମୋର
ଖୁସି ଲଭେ କର୍ମର ।
ଦେଶ ନିର୍ମାଣରେ ମିଳେ
ଆନନ୍ଦ ଯେ ଅପାର
ଆଜି ଏଠି କାଲି ସେଠି
କର୍ମରେ ମୁଁ ତତ୍ପର ।
ଦେଖୁଛ ଯେ ଅଟ୍ଟାଳିକା
ନଭଶ୍ଚୁମ୍ଭୀ ପ୍ରାଚୀର
ଅଗଣିତ ଶିଳ୍ପ କ୍ଷେତ୍ରେ
ଛାପ ରହେ ଆମର ।
ଆମ ତ୍ୟାଗ ଅସୁମାରୀ
କିଏ କରେ ବିଚାର
କିଏ ବା ତାଚ୍ଛଲ୍ୟ ସ୍ଵରେ
କରେ କେତେ ଧିକ୍କାର ।
ଗାଳି ମାଡ ସହି ଚାଲୁ
କେତେ ଯେ ଅତ୍ୟାଚାର
ତଥାପି ଦାମ୍ଭିକ ଚିତ୍ତେ
କର୍ମେ ଦେଖୁ ଈଶ୍ୱର ।
କର୍ମର ସନ୍ଧାନେ ଯାଉ
ଛାଡି ଘର ସଂସାର
କେଉଁଠି ଦାଦନ ଖଟୁ
ମାଲିକ ଯେ ନିଷ୍ଠୁର ।
ତନୁ ମନ ଦେଇ କରୁ
ମାଲିକକୁ ନିଜର
ତଥାପି ବଞ୍ଚିତ କେବେ
କଥା ପଦେ ମଧୁର ।
କର୍ମରେ ଆଦର ଆମ
କର୍ମ ହିଁ ଯେ ଈଶ୍ୱର
ହତାଦର କରିବାନି
କର୍ମ ଆମ ଆଧାର ।
ଶ୍ରମରେ ଶ୍ରମିକ ଦେଖ
ଶ୍ରମିକଠି ଶ୍ରମର
ଆଦର କର ଶ୍ରମକୁ
ଶ୍ରମ ହିଁ ଯେ ଈଶ୍ୱର ।
ଶ୍ରମିକ ପ୍ରେମର ପାତ୍ର
ନିଃସ୍ଵାର୍ଥର ସାଗର
ତ୍ୟାଗପୂତ ଜୀବନଟା
ଦେବତାର ମନ୍ଦିର ।
ଆମ ସୁଖ ସମୃଦ୍ଧିର
ଉତ୍ସ ସେହି ଶ୍ରମର
ସପ୍ରେମେ କର ସ୍ୱାଗତ
ଶ୍ରମିକ ହିଁ ନିଜର ।
