Library
ଭିନ୍ନ ଏକ ସ୍ମୃତିର ପୃଷ୍ଠାରେ
ଭିନ୍ନ ଏକ ସ୍ମୃତିର ପୃଷ୍ଠାରେ
ସେହି ପିଲାଦିନ ମୋର ଆସିଥିଲା
ପୁଣ୍ୟ କାଠଯୋଡ଼ି ତୀରେ
ନଦୀ ପଠା କାଶତଣ୍ଡୀ ଫୁଲର ଶୋଭାରେ
ସୁନିର୍ମଳ ଜଳରାଶିର ନୀଳ
ନୀଳ ଢେଉରେ
ସୁନା ରଙ୍ଗ କନିଅରର
ଅପୂର୍ବ ଶୋଭାଙ୍ଗନରେ
ସେହି ପିଲାଦିନ ମୋର ଆସିଥିଲା
ସାଙ୍ଗସାଥୀ ମେଳରେ
ବୋହୂ ବୋହୂକା ଖେଳରେ
ସଢ଼େଇରେ ଭାତ ଡାଲି ରାନ୍ଧି
ପରଷି ଦେବାରେ
ପୁଚି, କବାଡି, ଲୁଚକାଳି ଖେଳର ଆସରେ
ସେହି ପିଲାଦିନ ମୋର ଆସିଥିଲା
ବହି ବସ୍ତାନି ଧରି ସ୍କୁଲ ଯିବା ରାସ୍ତାରେ
ଅଣ ଓଷାରିଆ ଧୂଳି ଧୂସରିତ
କିଆ ଗୋହିରୀ ମଧ୍ୟରେ
ଜାମୁକୋଳିର ମିଠା ମିଠା ସ୍ୱାଦରେ
ରୀନା, ଲିନା, ବୁବୁ, ଟୁବୁଙ୍କ
ମନ ମାତାଣିଆ ନିର୍ଭେଜାଲ
ଜୀବନ ସଙ୍ଗୀତରେ
ସେହି ପିଲାଦିନ ମୋର ଆସିଥିଲା
ଦୋଳ ଯାତ, ହୋଲିର ରଙ୍ଗ ଅବିରରେ
ରଜ ଦୋଳି, ପୋଡ଼ ପିଠା, ତାସ,
ବାଗୁଡ଼ି ଖେଳରେ
ରଜ ପାନର ମିଠାମିଠା ବାସ୍ନାରେ
ଘର ଘର ବୁଲି ଖୁସି ମନେଇବାରେ
ସେହି ପିଲାଦିନ ମୋର ଆସିଥିଲା
ଭୋଦୁଅର ଖୁଦୁରୁକୁଣୀ ଓଷାରେ
ରାତି ଘଡ଼ିଏ ଥାଇ କାହାର
ବାଡ଼ି,ଘରୁ ଫୁଲ ଚୋରି କରିବାର
ନିଆରା ଆନନ୍ଦରେ
ଅଶିଣର ଜହ୍ନି ଓଷାରେ
କୁମାର ପୁନେଇଁ ଜହ୍ନରେ
ଫୁଲ ବଉଳ ବେଣୀ ଗୀତରେ
ଅନାବିଳ ଆତ୍ମ ସନ୍ତୋଷରେ
ସେହି ପିଲାଦିନ ମୋର ଆସିଥିଲା
ବାପା ମାଆଙ୍କ ଅଧୁରା ସ୍ବପ୍ନରେ
ମଣିଷ ଭଳି ମଣିଷ ହେବାର
ସୁଦୃଢ଼ ଦସ୍ତାବିଜରେ
କେମିତି କେଜାଣି ଏତେ ସବୁ ଇସ୍ତାହାର
ପାଣି ଫୋଟକା ଭଳି ମିଳାଇ ଗଲା
ଏବେ ସେସବୁ କେବଳ
ଏ ଜୀବନ ସଞ୍ଜରେ
ଶୋଭା ପାଏ
ଭିନ୍ନ ଏକ ସ୍ମୃତିର ପୃଷ୍ଠାରେ
ଭିନ୍ନ ଏକ ସ୍ମୃତିର ପୃଷ୍ଠାରେ ।
