ଶ୍ରମିକ କୃଷକ ହେବେ ଶାନ୍ତି ଯୁଦ୍ଧର
ଶ୍ରମିକ କୃଷକ ହେବେ ଶାନ୍ତି ଯୁଦ୍ଧର
ଫୁଲର ଭିତରେ ଗୋଲାପ ପରି ସୁନ୍ଦର
ଅଟଇ ଛୋଟ ଶିଶୁଟିର ହସ,
ସେ ହସ ରଖିଲେ, ମକରନ୍ଦ ପରି ସମାଜ
ରେ ଆସେ ଉତ୍ତମ ନିର୍ଯାସ |୧|
ଶିଖିଛି ତାହା ଚିରନ୍ତନ, ନିତ୍ଯ ସନାତନ,
ତେଣୁ ତହିଁରେ ମନ ମୋ ରହୁ,
ଭେଦଭାବ ଭୁଲି ସମାଜ ହିତରେ ଯୋଡି
ହେବା ଭାବନା ସଦା ଝରୁଥାଉ |୨|
କିଛି ଭାବନ୍ତି ମଣିଷ ଅଟଇ ସ୍ୱାର୍ଥପର
ମାୟାବୀ, ଚିହ୍ନିବାଟା କଷ୍ଟକର,
ସ୍ବାର୍ଥ ପାଇଁ ବିଶ୍ବାସରେ ବିଷ ଭରି ଦିଏ,
ଚକ୍ରାନ୍ତରେ ଜୀବନ ନିଏ କାହାର |୩|
କିନ୍ତୁ ମୁଁ ଜାଣଇ ବିବେକ ଥିବାରୁ ଥାଏ
ଦୟା, ମଣିଷ ପଣିଆ ସମସ୍ତଙ୍କର,
ମାନବିକତାରେ ସମ୍ମାନ ଦିଏ କର୍ମ ନିଶା
ହୃଦୟରେ ପରିପୂର୍ଣ୍ଣ ଥାଏ ଯାର |୪|
ଜହର ପଶିଲା ମନରେ ଯଦି ବଡ ଲୋକ
ଓଁ ଲାଭ ଶୁଭ ଭାବନା ବିଚାର,
ମାନବିକତା ଛାଡି, ଲୋଭ ଲାଳସାର ବଶ
ହୋଇ, ହୁଅଇ ତ ସ୍ବାର୍ଥପର |୫|
ନିଜ ସ୍ୱାର୍ଥ ପାଇଁ ବଞ୍ଚେ ଏଇ ଦୁନିଆରେ
ହୁଏ ନାହିଁ ସିଏ ଆଉ କାହାର,
ପାଶେ ଥାଏ ତ ପାର୍ଥିବ ସୁଖର ଭଣ୍ଡାର,
ତଥାପି ମନଟା ହୁଏ ହାହାକାର |୬|
ଦ୍ୱାପରରେ ଗୋପ ବାସୀଙ୍କ ସ୍ୱାର୍ଥରେ,
ଗୋବର୍ଦ୍ଧନ ଧରିଲେ ଟେକି କେଶବ,
ସମସ୍ତଙ୍କୁ ଗିରି ତଳେ ଆଶୟ ଦେଇଥିଲେ
ସାତ ଦିନ ଯାଏଁ ପରା ମାଧବ |୭|
ଇନ୍ଦ୍ର ଗର୍ବରେ ହୋଇ ମତୁଆଲା ନିଜର
କର୍ତ୍ତବ୍ୟକୁ କଲା ସେ ଉପେକ୍ଷା,
ଶ୍ରୀକୃଷ୍ଣ ନିଜ କର୍ତ୍ତବ୍ୟକୁ ପାଳି କରିଲେ
ସର୍ବ ଗାଈ ଗୋରୁ ଜୀବ ସୁରକ୍ଷା |୮|
ଭାରତ ବର୍ଷ ତ ସୁନ୍ଦର, ଏଠାରେ ରୁହନ୍ତି
ମଣିଷ ଥାଇ ଭିନ୍ନ ଭିନ୍ନ ଜାତି,
ନବ ଆଶା କିରଣ ଦିଏ ମୋ ଭାରତେ ଥିବା
ସୁନ୍ଦର ସୁନ୍ଦର କଳା ସଂସ୍କୃତି |୯|
ଛୁଆ ଦିନୁ ଶିଖିଛି ଗଜମୋତି ହାର ଲୋଡା
ନାହିଁ, ଲୋଡାନାହିଁ ଅର୍ଥ ବଳ,
ମୋ ସଂସ୍କୃତି ଶିଖାଏ ଅର୍ଥ ଲାଭ ନିଶା ସରବ
ଅର୍ଥ ଓ ଅନର୍ଥର ମୂଳ |୧୦|
ତେଣୁ ସାମ୍ରାଜ୍ୟବାଦୀ ମନମୁଖୀରୁ ଦେଖୁ
ଅଛେ ଏବେର ଯୁଦ୍ଧର ତୋଡ,
ଥରି ଯାଏ ମଣିଷର ହୃଦ କୁତ୍ସିତ ଘୃଣାରେ
ଜଳୁଛି ଦେଖି ମିସାଇଲ୍ ମାଡ଼ |୧୧|
ନିରୀହ ପ୍ରାଣରେ ନିଆଁ ଜଳାଇ ପୁଂଜିବାଦୀ
ଶକ୍ତି କରୁ ଅଛନ୍ତି କଲବଲ,
ଶାନ୍ତି ରକ୍ଷା ପାଇଁ ଧରାର ଶ୍ରମିକ କୃଷକ ଉଭା
ହେବେ ନବ ଯୁଦ୍ଧର ମୂଳ |୧୨|