ଶ୍ରୀଜଗନ୍ନାଥ ପଞ୍ଚକମ୍

    

(ମୂଳ ସଂସ୍କୃତରୁ ଭାବାନୁବାଦ )

                  (1)

ସୁନ୍ଦର ବଦନ ତଵ ପଦ୍ମ ନେତ୍ର ଦୁଇ l

ରକ୍ତଅବ୍ଜ ଶୋଭାରାଶି ଗର୍ବକୁ ଗଞ୍ଜଇ ll

ଶିରରେ ହେମମୁକୁଟ ଗଳେ ରତ୍ନହାର l

କର୍ଣ୍ଣରେ ରତ୍ନ କୁଣ୍ଡଳ ଅତି ମନୋହର ll

ନବଘନ କଳେବର ଉପମା କି ଦେବା l

ମାଳାମାନ ଲମ୍ବିଥାଇ ସମୁନ୍ନତ ଗ୍ରୀବା ll

ପାରୁଶରେ ବିଜେ ଚକ୍ର ରାଜ ସୁଦର୍ଶନ l

ଭଜେ ଶ୍ରୀନୀଳାଦ୍ରୀନାଥ ପ୍ରସନ୍ନ ବଦନ ll

                     (2)

ଫୁଲ୍ଲେନ୍ଦୀବର ଲୋଚନୁ ଚକ୍ଷୁ ନ ଫେରଇ l

ନୀଳ ନବଘନ କାନ୍ତି, ଉପମା ତା' କାହିଁ ll

ଜଗତ ଠାକୁର ଆହେ ପ୍ରଭୁ ଜଗନ୍ନାଥ l

ପଦ୍ମ ପୟର ପୁଜନ୍ତି ଯାର ଚୋଉମାଥ ll

ଦୈତ୍ୟସଂହାରଣ ତଵ ନାମ ଦଇତାରୀ l

ବିମଳେନ୍ଦୁ ମୁଖ ତଵ ଶଙ୍ଖ ଚକ୍ର ଧାରୀ ll

ବନ୍ଦେ ପରମ ପୁରୁଷ ଶ୍ରୀପୁରୁଷୋତ୍ତମ l

ଶ୍ରୀପୀଠେ ନିତ୍ୟପୂଜିତ ପରଂବ୍ରହ୍ମ ନମଃ ll

                (3)

ଉଦିତ ନୀରଦ ତନୁ ଶୋଭା ଚନ୍ଦ୍ରମୁଖ l

ରାଜୀବଲୋଚନ କୃପା ବାରିଧି ମୟୂଖ ll

ଭକ୍ତ ଚିନ୍ତାମଣି ପ୍ରଭୁ ଦୟାର ସାଗର l

ଦର୍ଶନେ ତାଙ୍କର ସର୍ବଦୁଃଖ ଯାଏ ଦୂର ll

ବନ୍ଦେ ପରମ ପୁରୁଷ ଶ୍ରୀପୁରୁଷୋତ୍ତମ l

ତୀର୍ଥଚିନ୍ତାମଣି ନୀଳାଦ୍ରୀଶ ନମଃନମଃ ll

                   (4)

ସର୍ବାଳଙ୍କାର ଶୋଭିତ ରତ୍ନସିଂହାସନେ l

ଶଙ୍ଖକ୍ଷେତ୍ରେ ଶତଦଳ କମଳ ଆସନେ ll

ସାଥେ ଛନ୍ତି ବଳରାମ ଅଚ୍ୟୁତ ଅଗ୍ରଜ l

ନବଘନ କାନ୍ତି ଧର ବିଜେ ଦେବରାଜ ll

ବାମଭାଗେ ସୁଭଦ୍ରିକା ଦକ୍ଷେ ସୁଦର୍ଶନ l

ସ୍ଵଜନେ ଚତୁର୍ଦ୍ଧାମୂର୍ତ୍ତି କେଡ଼େ ଶୋଭାବନ ll

ବ୍ରହ୍ମା ରୁଦ୍ର ଇନ୍ଦ୍ର ବନ୍ଦ୍ୟ ବେଦଙ୍କର ସାର l

ସ୍ମରେ ବ୍ରହ୍ମଦାରୁ, ଦାରୁ ବ୍ରହ୍ମ ନମସ୍କାର ll

                   (5)

କାଦମ୍ବରୀ ପ୍ରୀୟ ହସ୍ତେ ଲଙ୍ଗଳ ମୁଷଳ l

ରତ୍ନହାର ଗଳେ ଶୋଭା କର୍ଣ୍ଣରେ କୁଣ୍ଡଳ ll

ବିପୁଳ ଭୁଜ ବିସ୍ତାରି ବିଜେ ସିଂହାସନ l

ସାରା ଅବନୀ ମଣ୍ଡଳ କରି ଆକର୍ଷଣ ll

ଶିରେ ଶୋଭେ ନାଗରାଜ ଚାରୁ ଗଣ୍ଡସ୍ଥଳ l

ସଂଗ୍ରାମେ ଚପଳ ରୂପ ଶଶାଙ୍କ ଧବଳ ll

ନମସ୍ତେ ଶ୍ରୀ କାମପାଳ ହଳୀ ସଙ୍କର୍ଷଣ l

ରୋହିଣୀନନ୍ଦନ ପ୍ରଭୁ ରେବତୀରମଣ ll

      

ଶ୍ରୀ ଜଗନ୍ନାଥ ପଞ୍ଚକ ସମାପ୍ତ ହୋଇଲା l

ଭଜ ଶ୍ରୀନୀଳାଦ୍ରୀନାଥ ନକରିଣ ହେଳା ll

  ଶ୍ରୀଜଗଦୀଶ୍ଵରଙ୍କର ଏ ଦିବ୍ୟ ପଞ୍ଚକ l

ଅଭ୍ୟାସ କର ସାଜୁଯ୍ୟ ମୋକ୍ଷ ପ୍ରଦାୟକ ll