ଶ୍ରାବଣ ଆସିଲେ ତୁମେ ମନେ ପଡ଼

ସେଦିନ ବର୍ଷାରେ ତୁମରି ସାଥିରେ

ସେଇ ନିର୍ଜନ ରାସ୍ତାରେ

ତୁମ ଆଖି ସହ ଏ ଆଖି ମିଶାଇ

ଭିଜୁଥିଲି ମୁଁ ପ୍ରେମରେ ।

କେହି ବି କେଉଁଠି ନ ଥିଲେ ପାଖରେ

ତୁମେ ଥିଲ ମୁଁ ଥିଲି

ତୁମରି ଛୁଆଁରେ ସେ ମିଠା ନିଆଁରେ

ସତେ ଅବା ଜଳୁଥିଲି ।

ଓଠ ଥିଲା ଚୁପ ଆଖି ଇସାରାରେ 

ହେଉଥିଲେ ଦୁହେଁ କଥା

ତୁମେ ବୁଝୁଥିଲ ମୋ ମନର କଥା

ଏଇ ହୃଦୟର ବ୍ୟଥା ।

ବର୍ଷା ଝରୁଥିଲା ଝର ଝର ହୋଇ

ଭିଜୁଥିଲା ତନୁ ମନ

ଏଇ ଜୀବନରେ କେମିତି ଭୁଲିବି

ପ୍ରେମର ପହିଲି ଦିନ ।

ମୋତେ ଛାଡ଼ି ତୁମେ ବଞ୍ଚି ପାରିବନି

ମଥା ଛୁଇଁ କଥା ଦେଲ

ପ୍ରତିଶୃତି ତୁମ ପ୍ରତାରଣା ହେଲା

ଭୁଲି ଦୂରେ ଚାଲିଗଲ ।

ସେଇ ରାସ୍ତା ଅଛି, ସେ ବରଷା ଅଛି

ମୁଁ ଆଜି ଭିଜୁଛି ଏକା

ତୁମ ସାଥେ ଆଉ ଏଇ ଜନମରେ 

ଜାଣିଛି ହେବନି ଦେଖା ।

ଶ୍ରାବଣ ଆସିଲେ କାହିଁକି କେଜାଣି 

ଏତେ ମନେପଡ ତୁମେ

ଆସ ଫେରି ଥରେ ମୋ ଜୀବନେ ସାଥି

ପ୍ରେମରେ ଭିଜିବା ଆମେ ।