ଶୋଇଯାଆ ମାମା

ଦେଉଛି ଆଉଁସି ଶୋଇଯାଆ ମାମା

ଆ ଲୋ ନିଦ ମାଉସୀ

ମୋ ମାମା ଆଖିର କଅଁଳ ପତାରେ

ହୋଇଯାଇ ତୁ ଲେସି ।

ସୁନା ଝିଅ ଆମ କରେନି ଅଝଟ

ମାଆ କଥା ଭାରି ମାନେ

ବୁଝାଇ ଦେଲେ ସେ ବୁଝି ଥାଏ ସବୁ

ମାମା ପରି ନାହିଁ ଜଣେ ।

ମାମାର ପାଖରେ ତା ଖେଳ କଣ୍ଢେଇ

ପଡିଲେଣି ସବୁ ଶୋଇ

ମାମା ବି ଶୋଇବ ଏଇ ସଙ୍ଗେ ସଙ୍ଗେ

ତା ଆଖିକୁ ମୁଦି ଦେଇ ।

ସୁନାନାକୀ ମାମା ଭାରି ସୁକୁମାରୀ

ସମସ୍ତେ କରନ୍ତି ଗେଲ

ସରାଗରେ ବାପା କାଖେଇ ମାମାକୁ

କରନ୍ତି ତାହାକୁ କୋଳ ।

କାନ୍ଧରେ ବସାଇ ଦେଖାନ୍ତି ମାମାକୁ

ଆକାଶର ଜହ୍ନ ତାରା

ଅଲିଅଳୀ ଝିଅ ଆମ ଝିଅ ମାମା

ଫୁଲକଳିଟିଏ ପରା ।

ନିଦ ମାଉସୀ ଲୋ ବସିଥା ଜଗିକି

ଆଖିକୁ ଦେଏ ମୁଦେଇ

ଶୋଇଲାଣି ମାମା ନିଘୋଡ଼ ନିଦରେ

ମାଆ ବି ପଡିବ ଶୋଇ ।

  -----