ଶ୍ମଶାନ

ଶ୍ମଶାନ ନୁହଁ ସେ ଶିବଙ୍କ ଆସ୍ଥାନ

            ସଭିଏଁ ପାଉଁଶ ସେଠି,

ଯେତେ ଧନୀ ଠାରୁ ଗରିବ ଯାଏଁ

             ହୁଅନ୍ତି ସବୁ ଏକାଠି l

ଆସିଛନ୍ତି ଏକା ଗଲାବେଳେ ଏକା

            ନ ଯିବେ କେହି ସାଙ୍ଗରେ,

ଏ ମାୟା ସଂସାରେ କିଛି ନେବା ନାହିଁ

            ଧର୍ମ ଏକା ରହେ ସାକ୍ଷୀରେ l

ସଭିଏଁ ପାଉଁଶ ହେବାରେ ସେଇଠି

            ଏ ତନୁ ରହିବ ନାହିଁ,

ମରିବା ନିଶ୍ଚୟ କେହି ରହିବେନି

             ଅଭିନୟ ସାରିଦେଇ l

ବିଦ୍ୟାଳୟ ଖୋଲା ପାଠ ପଢ଼ିବାକୁ

              ମନ୍ଦିର ଯେ  ପୂଜା ପାଇଁ,

ଶ୍ମଶାନ  ସେପରି  ସ୍ଥାପିତ  ହୋଇଛି

               ମଢ଼କୁ ପୋଡିବା  ପାଇଁ l

ଯେତେଦିନ ଆମେ ଧରାରେ  ରହିବ

               ପରହିତେ ଜୀବନ ଦେବା,

ଶ୍ମଶାନକୁ ଯାଇ   ପାଉଁଶ ହୋଇଲେ

               ବୈକୁଣ୍ଠପୁରକୁ  ଯିବା l

ଜନମ ମରଣ ଅନ୍ୟଥା  ନୁହଁଇ

              ଏ  ସବୁ ବିଧିର  ବିଧାନ

ପର ସେବା କରି ସଭିଏଁ  ମରିଲେ

               ଧନ୍ୟ ହୋଇବ  ଜୀବନ l