ଶକ୍ତି ସ୍ଵରୂପିଣୀ
ଶକ୍ତି ସ୍ଵରୂପିଣୀ
ପାର୍ବଣ ଆସିଲେ ଜହ୍ନ ଆକାଶରେ ହୋଇ ଉଠଇ ଉଜ୍ଜ୍ଵଳ,
ଝରଇ ଶିକର ଅବା ସୁଧା ଧାର ପ୍ରକୃତି ଦିଶେ ସୁନ୍ଦର;
ଧବଳ ତାମର ଢାଳେ ଅବିକଳ,
ନଈ ପଠା ଧାର କରିଣ ସୁନ୍ଦର;
ଫୁଟେ କାଶତଣ୍ଡି ଫୁଲ; ପାର୍ବଣ ଆସିଲେ...।।
ଏଇ ଶରତରେ ପାର୍ବତୀ ଶଙ୍କର କୋଳେ ଜନ୍ମ ଗଜାନନ,
ଏଇ ଶରତରେ ଶିଳ୍ପୀ କାରୀଗରେ ବିଶ୍ଵକର୍ମା ଆବାହନ;
କୃଷ୍ଣ ଭଗବାନ ଭାଗବତ ଜନ୍ମ,
ଅନନ୍ତା ଅନନ୍ତ ବ୍ରତ ଉଦ୍ଜାପନ;
ପରେ ଆସଇ ପାର୍ବଣ; ଏଇ ଶରତରେ...।।
ସବୁ ଦେବା ଦେବୀ ସଙ୍ଗେ ଘେନି ଦେବୀ ବିନ୍ଧ୍ୟଗିରୀ ପାଦ ଦେଶେ,
ଉଭା ହେଲେ ଆସି ପରମ ବୈଷ୍ଣବୀ ଦଶଭୂଜା ଯୋଧ୍ରୁ ବେଶେ;
ପ୍ରକୃତି ସଜାଇ ଦେଇଅଛି ଧାତ୍ରୀ,
ମଣିମୟ ମଣ୍ଡ ପରେ ଜଗଧାତ୍ରୀ;
ସ୍ଵାଗତେ ଆସ ଉଲ୍ଲାସେ; ସବୁ ଦେବା ଦେବୀ...।।
ଧବଳ ଚଦର ସମ ଆକାଶର ନୀଳ ରଙ୍ଗ ଶୋଭାବନ,
ଶୁଭ୍ର ମେଘ ମାଳ ଉଡ଼ନ୍ତି ଚଞ୍ଚଳ ଫୁଲ ଫୁଟିଛି କଞ୍ଚନ;
ଏମନ୍ତ ଶୋଭାରେ ପ୍ରକୃତି ସୁନ୍ଦର,
ନନ୍ଦନ ବନ ବି ନୁହେଁ ପଟାନ୍ତର;
ହେବ ଦେବୀ ଆଗମନ; ଧବଳ ଚଦର ସମାନ...।।
ଦୁର୍ଦ୍ଦିନ ଆସିଛି ଲିଭି ଯାଉଅଛି ଉତ୍କର୍ଷତା ଅନୁକ୍ଷଣେ,
ମେଦିନୀ ଛାତିରେ ପଦାଘାତ କରେ ମହିଷାସୁରର ସୈନ୍ୟେ;
ବିକଳ କାନ୍ଧଣା ନାରୀ ନିର୍ଯାତନା,
ଭୁଲି ସ୍ନେହ ପ୍ରେମ ପର କି ଆପଣା;
ହିଂସା କ୍ରୋଧ ଅଭିମାନେ; ଦୁର୍ଦ୍ଦିନ ଆସିଛି...।।
ଶକ୍ତି ସ୍ଵରୂପିଣୀ ଅମ୍ଵିକା ଭବାନୀ ତୋର ନିରାଜନା ଛଳେ,
ଭକ୍ତି ପ୍ରାଣ ପୁଷ୍ପ ଅରପଣ କଲି ଶରଣ ତୋ ପାଦ ତଳେ;
ଜଗତ ଉଦ୍ଧାର ଜଗତ ମଙ୍ଗଳ,
ମନାସଇ କବି ତୋର କରବାଳ;
ପାପ ନାଶ କରୁ ଖରେ; ଶକ୍ତି ସ୍ଵରୂପିଣୀ...।।