ଶିଶୁଦିବସ
ଶିଶୁଦିବସ
ନୀଳ ଆକାଶର ଟିକିଟିକି ତାରା
ଅଟନ୍ତି ଏ ଶିଶୁଗଣ,
ଫୁଲ ବଗିଚାର ଫୁଲକଢ଼ି ସିଏ
ଦିଶୁଛନ୍ତି ମନୋରମ ।
ଦେଶ ଓ ଜାତିର ଅମୂଲ୍ୟ ନିଧି ସେ
ଭବିଷ୍ୟତ ନାଗରିକ,
ଉତ୍ତମ ଚରିତ୍ର ଗଠନ ହୋଇଲେ
ହେବେ ସମାଜ ସେବକ ।
ଜବାହାରଲାଲ ନେହେରୁ ଦେଶର
ପ୍ରଥମ ପ୍ରଧାନମନ୍ତ୍ରୀ,
ଏହି ଆଧୁନିକ ଭାରତ ବର୍ଷର
ଅଟନ୍ତି ନିର୍ମାଣ ଯନ୍ତ୍ରୀ ।
ଶିଶୁ ମାନଙ୍କର ଅନାବିଳ ପ୍ରେମ
ତାଙ୍କପ୍ରତି ଆକର୍ଷଣ,
ଶିଶୁଦିବସ ରୂପରେ ପାଳିଲେ
ତାଙ୍କରି ଜନମ ଦିନ ।
ଅନେକ ଯୋଜନା କରିଲେ ନେହେରୁ
ଶିଶୁଙ୍କ ବିକାଶ ପାଇଁ,
ଶିଶୁଙ୍କ ବିକାଶ ହୋଇଲେ ଭାରତ
ନିଶ୍ଚୟ ଯିବ ଆଗେଇ ।
ସୁସ୍ଥ ଚାରାଗଛ ମାଳୀ ରୋପିଥାଏ
ସୁନ୍ଦର ଉଦ୍ୟାନ ପାଇଁ,
ସୁସ୍ଥ ଶିଶୁଟିଏ ବିକଶିତ ହେଲେ
ଏ ଦେଶ ଯିବ ଆଗେଇ ।
ଉଣେଇଶ ଶହ ଚଉଷଠି ସନ
ନଭେମ୍ବର ଚଉଦକୁ,
ବିଧିବଦ୍ଧ ଭାବେ ପାଳନ କରିଲେ
ଶିଶୁଦିବସ ରୂପେ ତାକୁ ।
ସମଗ୍ର ଭାରତ ବର୍ଷରେ ପାଳିଲେ
ଶିଶୁର ସମ୍ମାନ ପାଇଁ,
ଚାଚାନେହେରୁ ହେ ଚିରକାଳ ଲାଗି
ହୋଇଗଲ କାଳଜୟୀ ।
ଯେତେଦିନ ଯାଏ ଏ ଭାରତବାସୀ
ପାଳିବେ ଶିଶୁ ଦିବସ,
ସେତେଦିନ ଯାଏ ତବ ଯଶ ଗାନ
ଗାଉ ଥିବ ଇତିହାସ ।