ଶିକ୍ଷା ଦୁନିଆଁ

ଅଜ୍ଞାନ ଜଗତେ ଜ୍ଞାନ ଦୀପ ଜାଳେ 

    ଆଜି ଏ ଶିକ୍ଷା ଦୁନିଆଁ 

ପଥଭ୍ରଷ୍ଟଙ୍କୁ ସେ ବାଟକୁ ଆଣଇ 

   ଦେଇ କି ସଂସ୍କାର ଛୁଆଁ l

ଅଶିକ୍ଷିତକୁ ସେ ଶିକ୍ଷିତ କରାଏ 

   ଶିକ୍ଷାଦୀକ୍ଷା ଢାଳି ଦେଇ 

ଶିକ୍ଷାର ଆଲୋକେ ଜଗତଟା ହସେ 

  କେତେ ନୀତିଶିକ୍ଷା ପାଇ l

ଶିକ୍ଷା ପାଖେ ନାହିଁ ଉଚ୍ଚନୀଚ୍ଚ ଭାବ 

   ନାହିଁ ତ ଜାତି ଅଜାତି 

ଦେଖେ ନାହିଁ ସିଏ ଧନୀ କି ଗରିବ 

   ସଭିଙ୍କୁ ଦିଅଇ ଖ୍ୟାତି l

ଚିନ୍ତା ଚେତନାର ବିକଶିତ ଘଟି 

   କୁସଂସ୍କାର ଯାଏ ହଜି 

ଜ୍ଞାନ ବିଜ୍ଞାନର ନବୀନ କିରଣେ 

   ସଭିଏଁ ଯାଆନ୍ତି ମଜି l

ଶିକ୍ଷା ଦିଏ ଶାନ୍ତି ସୁଖର ସମୃଦ୍ଧି 

   ଅବା ମାନ ସନମାନ 

ଶିକ୍ଷା ଥିଲେ ପାଶେ ଦୁନିଆଁଟା ହସେ 

    ଗଢ଼ି କେତେ କୀର୍ତ୍ତିମାନ l

ଏ ଶିକ୍ଷା ଦୁନିଆଁ ସବୁଠୁ ନିଆରା 

   ମନେ ଭରେ ଶିଷ୍ଟାଚାର 

ଉତ୍ତମ ଶିକ୍ଷାର ସୁଗୁଣ ମହକେ 

   ହସି ଉଠେ ଏ ସଂସାର l