ଶୀତ
ଶୀତ
ଶୀତଳ ପବନ କୁହୁଡ଼ି କୁ ଧରି
ନଇଁ ନଇଁ ଆସେ ଶୀତ
ଘାସ ଗାଲିଚାରେ ଶିଶିରକୁ ଦେଖି
ସୁରୁଜ ଗାଉଛି ଗୀତ ।
ଶୀତ ଶିହରଣେ ଖେଳିଯାଏ ସବୁ
ବାଡ଼ି ,ଦାଣ୍ଡ ଓ ଦୁଆର
ପିଆଜ ଧରି ମୁଁ ଦୁରେଇ ବସିଛି
ପଖାଳକୁ ଦେଖି ଡର ।
ଅଜା ବସିଛନ୍ତି କଅଁଳ ଖରାରେ
ଚାହା କପ୍ ଟିକୁ ଧରି
ଖବର କାଗଜେ ବୁଲାନ୍ତି ଆଖିକୁ
ନକରି ଜମାରୁ ଡେରି ।
ଧରଣୀ ରାଣୀ ହଳଦୀ ଶାଢୀରେ
ଆଃ କି ସୁନ୍ଦର ଦିଶୁଛି
ଚଷାପୁଅ ଦେଖ ଦାଆଟିକୁ ଧରି
ଭୋରୁ ବିଲକୁ ଧାଇଁଛି ।
ସହରେ ଉଲବୁଣା ନେପାଳୀ ଝିଅ
ପସରା ମେଲି ବସିଛି
ରଙ୍ଗ ବେରଙ୍ଗ ଦାମୀ ପଶମ ଦେଖି
ଗରାଖ ଭିଡ଼ ଲାଗିଛି ।
ହାଡ଼ ଭଙ୍ଗା ଶୀତ ଭାଙ୍ଗେ କେତେ ମନ
ଫୁଟପାଥ ନିରୀହର
ଚିରା କନ୍ଥାରେ ପଶି ଛାଡ଼ିଯାଏ ସେ
ସ୍ମୃତିର ପରଶ ତା'ର ।