ଶୀତ
ଶୀତ
କାକର ହକଳା ଘାସ ଗାଲିଚାରେ
ପାଦ ଥାପିଥାପି ଥିରିଥିରି,
ଶୀତ ଆସିଲାଣି କାଲୁଆ ପବନ
କୁହୁଡି, କାକର ସାଥେ ଧରି |
ସାଲ, ସୁଏଟର,ଚଦର,କମ୍ବଳ,
ରହିଥିଲେ ଯେତେ ମୁହଁମାଡି,
ଏବେ ଦୋକାନରେ ସଜା ହୋଇଲେଣି
ଚାରିଆଡେ ଦେଖ ଧାଡିଧାଡି |
ଶୀତଡରେ ଏବେ ନିଇତି ସୂରୁଜ
ସକାଳୁ ଆସୁଛି ଡେରିକରି,
ବୁଢ଼ାବୁଢ଼ିମାନେ ସକାଳୁ ନଉଠି
ଶୋଉଛନ୍ତି ହୋଇ ଘୋଡିଘାଡି |
ଶୀତସକାଳରେ ଗାଆଁ ଦାଣ୍ଡେ ଭିଡ
ଧୁନି ଚାରିପଟେ ବସିବସି,
ଗପର ଆସର ଜମେଇ ଦିଅନ୍ତି
ମଉସା,ପୁତୁରା,ଜେଜେ ମିଶି |
ଶୀତକୁ ନଡରି ଚାଷୀଭାଇ ଯାଏ
ଗହୀର ବିଲକୁ ଧାନକାଟି,
ସୁନେଲି ଫସଲ ଦେଖିଦେଲେ କ୍ଷେତେ
ଫୁଲି ଉଠିଥାଏ ତାର ଛାତି |
ପାଚିଲା କ୍ଷେତରେ ଲହଡି ଭାଙ୍ଗଇ
କୋହଲା ପବନ ଶିରିଶିରି,
ଦେଖିଲେ ଲାଗଇ ଲକ୍ଷ୍ମୀଠାକୁରାଣୀ
ସୁନା ଆଉଟି କି ଦିଏ ଢ଼ାଳି ।
ସୋରିଷ କ୍ଷେତରେ ସୁନାରଙ୍ଗ ଢ଼େଉ
କାହିଁ କେତେଦୂରୁ ମନ ଟାଣେ,
ବାଡିରେବାଡିରେ ଗେଣ୍ଡୁଫୁଲ ଫୁଟି
ଲକ୍ଷ୍ମୀଠାକୁରାଣୀ ମନ ଜିଣେ |
ପରିବା ବଜାରେ ପଶିଗଲେ ଏବେ
ଗ୍ରାହକର ମନ ଉଠେ ମାତି,
କେଉଁଟାକୁନେବ,କେଉଁଟାଛାଡିବ
ବିଚରା ସେ ପାରୁନାହିଁ ବାଛି |
କୋବି,ମୂଳା,ବିନ୍, ଟମାଟ,ଗାଜର,
ପତ୍ରକୋବି,ଶିମ୍ବ ଆସିଲେଣି,
ପାଳଙ୍ଗ,କୋଶଳା,କ୍ୟାପ୍ସିକମ୍,ସାଥେ
କାକୁଡି,ବିଟ୍ ବି ମିଶିଲେଣି |
ବାସିପଖାଳଟା ଶୀତଡରେ ଏବେ
କାଞ୍ଜିତୋରାଣୀରେ ଲୁଚିଲାଣି ,
ଗରମ ଚାଆକୁ ଗରମ ପକଡି
ମହମହ ହୋଇ ବାସିଲାଣି |
ସଞ୍ଜନଇଁଗଲେ ଚୁଲିମୁଣ୍ଡେ ଭିଡ
ନିଆଁ କହେ ଏଠୁ ଯାଆନାହିଁ,
ପାଣିକି ଦେଖିଲେ ଡର ମାଡୁଅଛି
କହେ ସେ ମୋ ଆଡେ ଆ ନାହିଁ |
କେଡେ ସୁନ୍ଦରିଆ ରୂପେଲି ଜହ୍ନଟା
ପାଣ୍ଡୁରପାଣ୍ଡୁର ଦିଶିଲାଣି,
କମଳକଢ଼ିଟି ଫୁଟି ପାରୁନାହିଁ
ଶିଶିର ତା ମୁଖ ପୋଡିଲାଣି |
ଶୀତଆଣିଅଛି ଧରଣୀବୁକୁରେ
ସାଥେଧରି ନାନା ପରବକୁ,
ପ୍ରଥମାଅଷ୍ଟମୀ,କାଞ୍ଜିଅଳା,ଧନୁ,
ମାଣବସା ପୁଣି ମକରକୁ |
ଖଟାମିଠା କେତେ ଅନୁଭବ ଆଣି
ଶୀତଆସିଅଛି ଆମପାଶେ,
ଆମପାଶେ ରହି କିଛିଦିନ ପୁଣି
ଫେରିଯିବ ସିଏ ତାର ବାସେ |
ଶୀତ ଚାଲିଯିବ ସାଥେନେଇତାର
ଶୀତର ଯେତେକ ସମ୍ଭାରକୁ,
ସେସବୁକୁ ପୁଣି ପାଇବାକୁ ଆମେ
ଚାହିଁଥିବା ଆର ବରଷକୁ |