କଥାଟି ଦିହକୁ ନେବେନି

କହିବି କଥାଟି ଦିହକୁ ନେବେନି ଲାଗିବ ଟିକିଏ ପିତା,

କେବଳ ମୋ ପାଇଁ ନୁହେଁ ସଭିଙ୍କର ମନ ଭିତରର କଥା ।

ମୋର ମୃତ୍ୟୁପରେ ଫୁଲତୋଡ଼ା ଧରି ପ୍ରଶଂସା କରିବ କାନ୍ଦି,

ଦେଖିବି ନାହିଁ କି ଶୁଣିବି ନାହିଁ ମୁଁ ଗାଳି ଦେଉଥିବ ଯଦି ।

ମୋର ଦୋଷାଦୋଷ କ୍ଷମା କରିଦେଇ ଦେଖାଇବ ବଡ଼ପଣ,

ମୋ ସହିତ ମିଶି ଖୁସି ହେଇଥା'ନ୍ତ ଆହୁରି ବହୁତ ଦିନ ।

ଭଲକରି ଆଉ କଥା ହେବାପାଇଁ ଇଚ୍ଛା ଥିଲା କହୁଥିବ,

ମୋଠାରୁ କେ କେବେ କିଛି ପାଇଥିଲେ ତାକୁ ମନେ ପକେଇବ ।

ତୁମେ କରୁଥିବ ଶୋକସଭା ମିଶି ମୋ ଦୁଆରେ ଠିଆହେଇ,

ଈଶ୍ଵରଙ୍କ ପାଶେ ପ୍ରାର୍ଥନା କରିବ ମୋ ଆତ୍ମାର ଶାନ୍ତିପାଇଁ ।

ଯାହା ଦେବାକଥା ଯାହା ନେବାକଥା ଯାହା କହିବାର ଅଛି,

ବଞ୍ଚି ଥାଉଁଥାଉଁ ଦେଇଦିଅ ମୋତେ ନେଇଯିବି ବାଛିବାଛି ।

ଆଖି ତ ଦେଖିବ କାନ ବି ଶୁଣିବ ହୃଦୟ ଶୀତଳ ହେବ,

ଜୀବ ଗଲାପରେ ସବୁହେବ ମିଥ୍ୟା କାହାର ଲାଭ ନ ଥିବ ।