ଏ ଦୁନିଆ ହେବ ଶୁଦ୍ଧ
ଏ ଦୁନିଆ ହେବ ଶୁଦ୍ଧ
ରାଜସୁଖ ତୁମେ ତୁଚ୍ଛ କରିଦେଲ
ସତ୍ୟର ସନ୍ଧାନ ପାଇଁ ,
ବୋଧି ଦ୍ରୁମ ତଳେ ତପ ଆରମ୍ଭିଲ
ହେ କଲ୍ୟାଣମୟ ସାଇଁ ।
ଦିନ ପରେ ଦିନ ମାସ ପରେ ମାସ
ଭୋଗି ଅସରନ୍ତି କ୍ଳେଶ ,
ତପସ୍ୟାରେ ସିଦ୍ଧି ପ୍ରାପତ ହୋଇଲ
ଶୋଚନା ନ ଥିଲା ଲେଶ ।
ଜଗତ ପ୍ରାଣୀଙ୍କ ଦୁଃଖର କାରଣ
ଜାଣି ପ୍ରଚରିଲ ଆସି ,
"ମୂଲ୍ୟହୀନ କିଛି କାମନା କରିଲେ
ଦୁଃଖଟି ପକାଏ ଗ୍ରାସି ।
ନିଷ୍କାମ ଭାବରେ କର୍ମ କରିଚାଲ
ଫଳ ଯାହା ଦେବେ ସାଇଁ ,
ଧରିନେବ ତାହା ଦେଇଛନ୍ତି ସିଏ
ତୁମରି କଲ୍ୟାଣ ପାଇଁ ।
ସତ୍ୟ,ଅହିଂସାର ମାର୍ଗରେ ଚଳିଲେ
ହୋଇବ ସଂସାର ହିତ ,
ମରତ ଧାମରେ ସରଗର ସୁଖ
ଭୋଗିବ ଏ ଧ୍ରୁବ ସତ ।"
ତୁମ ଆଦରଶ ପାଳନ କରିଲେ
ଏ ଦୁନିଆ ହେବ ଶୁଦ୍ଧ ,
କାମନାକୁ ଜିଣି ଆଜି ବି ଅମର
ରହିଅଛ ତୁମେ ' ବୁଦ୍ଧ ' ।
ବି. ନିରୁପମା
ମାମୁରିଆ, ଛେଣ୍ଡିପଦା,ଅନୁଗୋଳ ।